Ձեր վստահելի աղբյուրը

Վրաստանի վարչապետ Իրակլի Ղարիբաշվիլին հանդիպել է Նիկոլ Փաշինյանի հետ։

1tv.ge-ի հաղորդմամբ, ըստ Վրաստանի կառավարության աշխատակազմի՝ միջկառավարական տնտեսական համագործակցության հանձնաժողովի նիստից առաջ կառավարության աշխատակազմում տեղի ունեցած դեմ առ դեմ հանդիպմանը կողմերը քննարկել են երկրների միջև առկա արդյունավետ համագործակցությունը, որն անցել է նոր՝ ռազմավարական գործընկերության մակարդակ։

«Ինչպես վարչապետ Իրակլի Ղարիբաշվիլին նշել է, Վրաստանի և Հայաստանի Հանրապետության միջև հարաբերությունների անցումը ռազմավարական գործընկերության մակարդակի կամրապնդի երկրների միջև համագործակցությունը։

Վարչապետները քննարկել են երկրների միջև համագործակցության օրակարգի հիմնական հարցերը և գնահատել միջկառավարական տնտեսական հանձնաժողովի աշխատանքի դինամիկան։ Ուշադրություն է դարձվել Վրաստանի և Հայաստանի Հանրապետության միջև առևտրատնտեսական, տրանսպորտի, լոգիստիկայի և մշակույթի ոլորտներում համագործակցությանը։

Կողմերը քննարկել են նաև տնտեսության ոլորտում համագործակցության նոր ուղղություններն ու համագործակցության նոր հեռանկարները։ Ընդգծվել է երկու երկրների միջկառավարական տնտեսական համագործակցության հանձնաժողովի դերը, որը կարեւոր հարթակ է երկրների միջեւ կապերի ամրապնդման համար։

Քննարկված հարցերի թվում էին անվտանգության միջավայրն ու մարտահրավերները տարածաշրջանում և աշխարհում։ Իրակլի Ղարիբաշվիլին ընդգծել է հարավկովկասյան տարածաշրջանում խաղաղությանն ու կայունությանը աջակցելու կարևորությունը և նշել, որ խաղաղության և կայունության ապահովումը նոր հնարավորություններ կբերի տարածաշրջանին։

Հանդիպմանը նշվել է Վրաստանի կարևոր դերն ու ջանքերը տարածաշրջանում խաղաղության և կայունության հաստատման գործում, այդ թվում՝ Թբիլիսիում կայացած Հայաստանի և Ադրբեջանի Հանրապետությունների վարչապետների հանդիպումը։ Իրակլի Ղարիբաշվիլին նշել է, որ Վրաստանը շարունակում է իր պատրաստակամությունը հայտնել՝ ուղղորդելու ջանքերը տարածաշրջանի խաղաղ զարգացման համար»,- ասված է տեղեկատվության մեջ։