Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանը ցավակցություն է հայտնել Ստամբուլի իտալական կաթոլիկ եկեղեցու վրա զինված հարձակման հետևանքով քաղաքացու մահվան կապակցությամբ և ասել, որ կասկածյալները շուտով կկալանավորվեն։ «ՌԻԱ նովոստի»-ն գրում է, որ այդ մասին հայտնել է Թուրքիայի ղեկավարի վարչակազմը։

Թուրքիայի ներքին գործերի նախարար Ալի Երլիքայան ավելի վաղ հայտնել էր, որ Ստամբուլի կաթոլիկ եկեղեցու վրա երկու դիմակավորված անձանց զինված հարձակման արդյունքում մեկ մարդ է զոհվել։ Իտալիայի արտաքին գործերի նախարարությունը Թուրքիայում դիվանագիտական առաքելությունների հետ միասին վերահսկում է իրավիճակը, ավելի վաղ հայտարարել էր Իտալիայի արտգործնախարար և փոխվարչապետ Անտոնիո Տայանին։

Էրդողանի՝ ինքնաթիռից ունեցած հեռախոսազրույցի տեսանյութը (նա Էսքիշեհիրում էր նախընտրական միջոցառման համար) հրապարակվել է X սոցիալական ցանցում՝ նախագահի աշխատակազմին առընթեր հաղորդակցության բաժնի ղեկավար Ֆահրեթին Ալթունի կողմից։ Զրույցի ընթացքում Էրդողանը ցավակցություն է հայտնել եկեղեցու քահանա Անտոն Բուլային, Սարիերի շրջանի պրեֆեկտ Օմեր Քալայլիին և նրանց կողքին գտնվող Լեհաստանի հյուպատոս Վիտոլդ Լեսնյակին։

«Այս պահին մեր բոլոր անվտանգության մարմինները մոբիլիզացված են և գործադրում են բոլոր անհրաժեշտ ջանքերը։ Կարծում եմ, որ կասկածյալները շուտով կբռնվեն»,-ասել է Էրդողանը։

Սոցցանցերում հայտնված միջադեպի տեսանյութում երևում է, թե ինչպես են կիրակնօրյա աղոթքի ժամանակ դիմակավորված երկու հոգի բախվում եկեղեցի, որտեղ կա առնվազն 20 մարդ, որոնցից մեկը դիտավորյալ կրակում է տղամարդու վրա, ով անմիջապես ընկնում է հատակին։ Այնուհետև հարձակվողը, դատելով ձայնագրությունից, «ստուգողական» կրակոց է արձակում և մի քանի անգամ կրակում եկեղեցու ներսում հատակին պառկած հավատացյալների ուղղությամբ։ Ստամբուլի նահանգապետ Դավութ Գյուլը հայտնել է, որ միջադեպի հետևանքով տուժածներ չկան, սակայն մեկ մարդ մահացել է։