Ձեր վստահելի աղբյուրը

«Այն, որ նիկոլական վարչակարգը փորձում է անընդհատ փոխել պետական, ազգային խորհրդանիշները, նորություն չէ, սա ընդհանուր առմամբ իրենց գծի մեջ է։ Բայց նրանք նման թեմաներով անընդհատ լցնում են դաշտը և ժամանակ, էներգիա չեն թողնում՝ քննարկելու Հայաստանի անվտանգության հարցերը, որոնք մոտալուտ գոյաբանական ու իրատեսական սպառնալիք են»,-Panorama.am-ի հետ զրույցում նման համոզմունք հայտնեց տեղեկատվական անվտանգության փորձագետ Կարեն Վրթանեսյանը։

Նա փաստեց՝ նման ու այլ մեկ օրվա կյանք ունեցող թեմաներով տարված՝ մենք չենք քննարկում Ադրբեջանի կողմից Հայատանի նկատմամբ պատերազմի վտանգը, պատերազմին պատրաստվելը։

«Այսօր ազգային ուժերը, մտահոգ մարդիկ, որոնք պատրաստ չեն Հայաստանը թողնել թշնամուն ու հեռանալ, ընդդիմադիրները քննարկում են թեմաներ, որոնք գուցե կարևոր լինեին այլ իրավիճակներում, այսպես ասած՝ Սերժ Սարգսյանի անվտանգ Հայաստանում։ Մինչև 2018-ի իրականությունում դրանք շատ տրամաբանական կլիներ քննարկելը,  բայց այսօր մեր գլխին ռեալ վտանգ է կախված՝ պետության գոյության, տարածաշրջանում հայերի մնալու հետ կապված, այս իրավիճակում մենք քննարկում ենք շատ էմոցիոնալ հարցեր, որոնք անվտանգային սպառնալիքներին ադեկվատ չեն»,-ասաց նա։

Փորձագետը հիշեց՝ թշնամու կողմից Արցախի շրջափակման առաջին ամիսներին ԱՀ իշխանությունները քննարկում էին, եթե փակեն ռեստորանները մարդիկ կարող է՝ վտանգ, սպառնալիք զգային։

«Սա այն դեպքում, երբ իրական սպառնալիք կար, մենք տեսանք հետևանքները, բառացիորեն դրված էր Արցախի լինել չլինելու հարցը։ Հիմա նույն իրավիճակը Հայաստանում է։ Իհարկե, պետական խորհրդանիշների վրա հարձակումը շատ կարևոր է, բայց արդյոք դրանք մեզ չե՞ն շեղում այն թեմաներից, որ թշնամին ամեն օր զինվում է, բացահայտ իր հավակնություններն է բարձրաձայնում Հայաստանի նկատմամբ ու որևէ պատասխան չի ստանում։ Երեկ քննարկում էին Սահմանադրությունը, այսօր՝ զինանշանը, դրանից առաջ՝ Մասիս սարը, հետո՝ պատմության դասագիրքը, երրորդ օրը՝ Նիկոլը մի անհաջող բան կանի, չորրորդ օրը՝ անհաջող դեմքի կբերի առաջին պլան։ Ու այսպես ամեն օր մի սկանդալ կա, որ օրն էլ սկանդալ չկա, գնում են՝ մի հին վիդեո են գտնում, տարածում են ու սկսում են իրար վրա ցեխ շպրտել, իրար մեղադրել»,-իրավիճակը ներկայացրեց Վրթանեսյանը։

Նա համոզված է, որ իշխանությունները դա հատուկ և  ծրագրված են անում։

«Թող չթվա, թե դա պատահականություն է։ Հստակ երևում է, որ սա սցենարով աշխատանք է՝ մարդկանց մտքերն անընդհատ զբաղեցնել, դաշտն անընդհատ լցնել միայն իշխանական օրակարգերով։ Այս իրավիճակում ընդդիմությունը պետք է իր օրակարգերն առաջ տանի, դա պետք է լինի ոչ միայն խոսքով, այլ գործով»,-ընդգծեց նա։

Որպես օրինակ, նա նշեց նոր Սահմանադրության անհրաժեշտության մասին հայտարարությանը հետևած զարգացումները։

«Եթե վտանգ կա, որ Սահմանադրությունը կփոխվի ու հակահայկական կդառնա, ապա հենց այսօրվանից պետք է սկսել ստեղծել քաղաքացիական ինչ-որ շարժում, ընդ որում այն պետք է ունենա ենթակառուցվածքներ՝ հաշվարկելու իրենց պոտենցիալը դիտորդական առաքելություն իրականացման համար, հասկանալու, արդյոք կա՞ այս առումով համակարգված խոսույթ, որը չլինի իրարամերժ, որը մարդկանց կբացատրի հնարավոր վտանգները։ Այս ամենը շատ կարևոր է, բայց էլի եմ կրկնում, մենք այսօր ունենք ֆիզիկական անվտանգության խնդիր, ինչը շատ քիչ հնչեղություն է ստանում, ուշադրության արժանանում դաշտում»,-ասաց փորձագետը։

Անկլավների հանձման շուրջ խոսակցություններն արդեն մարել են, մինչդեռ, ըստ Panorama.am-ի զրուցակցի, հանրապետության ողջ երթևեկությունն ու արտաքին աշխարհի հետ կապն ապահովում են այդ գյուղերով անցնող ճանապարհները, որոնք հայտնվելու են ադրբեջանական վերահսկողության ներքո։

«Մենք տեսել ենք՝ ինչ աղետ եղավ, երբ Նիկոլ Փաշինյանն ադրբեջանցիներին հանձնեց Գորիս-Կապան ճանապարհահատվածը, որը միացնում էր Հայաստանը Իրանին։ Այդ հատվածին իբր թե փոխարինող ճանապարհը գրեթե չի գործում, շատ վտանգավոր է, անընդհատ վթարներ են լինում։ Եվ այդ մասին ընդհանրապես չի խոսվում։ Չի խոսվում բանակում իրավիճակի մասին, խոսում են զենքի գնումների մասին, բայց համարյա չի խոսվում, այդ զենքը կիրառելի՞ է։ Հարյուրավոր նման հարցեր կան, ի վերջո իշխանությունների կոռուպցիոն գործարքները, ժողովրդի թալանը տարատեսական տույժ-տուգանքների, հարկատեսակների՝ անգամներով  բարձրացման տեսքով, փաստաբանների հարկային բեռի ավելացումը... Այս բոլոր հարցերը մնում են լուսանցքում, առաջին տեղում են գալիս Նիկոլի կեպկան, կախիչը, գերբը և այլն, և այլն»,-ասաց Կարեն Վրթանեսյանը։