Ձեր վստահելի աղբյուրը

«Սահմանադրական բարեփոխումների կեղծ քողի տակ փորձ է արվում վերացնել հայկական անկախ պետականությունը՝ այն վերածելով Թուրքիայից և Ադրբեջանից բացահայտ կախման մեջ գտնվող կիսապետական ինչ-որ մի կազմավորման։ «Նոր սահմանադրության» ընդունման նպատակը Հայաստանի անկախության հռչակագրի փաստացի չեղարկումն է...

Մեր երկրի համար այս ճակատագրական պահին վճռական հանձնառություն ենք ստանձնում  պայքարելու գործող վարչախմբի կողմից սկսած հակազգային ու հակապետական գործընթացի դեմ և մեզ հասու բոլոր օրինական միջոցներով խոչընդոտելու դրա իրականացմանը։ Կոչ ենք անում իրապես ազգային բոլոր ուժերին, հայրենիքի ճակատագրով մտահոգ քաղաքացիներին միանալու այս պայքարին՝ ձևավորելու անկախության  պաշտպանության միասնական ճակատ և թույլ չտալու հայկական անկախ պետականության  կազմալուծումը մեր երդվյալ թշնամիների կողմից»։ Ասված է «Հայաքվե» քաղաքացիական նախաձեռնության խորհրդի հայտարարության մեջ, որը հրապարակվեց  ասուլիսի ժամանակ։

Նախաձեռնության համակարգող Ավետիք Չալաբյանն ասաց, որ այս հայտարարությունը բաց է այլ կազմակերպությունների միացման համար։

Նա նշեց, որ եթե Հայաստանի Սահմանադրության փոփոխության բոլոր ընթացակարգերը պահպանվեն, ապա գործընթացը կարող է տևել վեց ամսից մինչև մեկ տարի։  Ա. Չալաբյանը վստահ է՝ բավարար ժամանակ է ձևավորելու միասնական ճակատ և խոչընդոտել այս  իշխանությունների ապազգային և հակապետական գործողության իրականացմանը։

«Առնվազն  չորս փուլ  պետք է լինի մինչև փոփոխությունները, յուրաքանչյուր փուլում փորձելու ենք գործադրել առավելագույն ջանքերը, որպեսզի այս գործընթացը հնարավոր չլինի տեղափոխել հաջորդ փուլ»,- նշեց նա։

«Հայաքվե» նախաձեռնության անդամ Մենուա Սողոմոնյանը մանրամասնեց, որ Սահմանադրության նախագիծը հանրաքվեի դնելու համար անհրաժեշտ է  պատգամավորների ընդհանուր թվի 2/3-ի համաձայնությունը, կազմում է 72 պատգամավոր. «Մեր առանջնահերթ  խնդրի վերջարդյունք ենք դիտարկում այն, որպեսզի  թույլ չտանք 72 պատգամավորի կողմից կողմ քվեարկելը»։

Չալաբյանը հիշեցրեց, որ ՔՊ-ն 71 պատգամավոր ունի, ուստի փորձելու է ազդել այլ խմբակցությունների, անկախ պատգամավորների վրա։

«Մեր խնդիրը պետք է լինի հետևյալը՝ համոզել ՔՊ խմբակցության գոնե մի քանի պատգամավորի, բավարար է 2-3 պատգամավոր, որպեսզի շեղվեն  այս գծից, որպեսզի հարցը չդրվի հանրաքվեի։ Մենք ոչ թե հույս ունենք, վստահություն ունենք, որ դրա իրական հնարավորությունը կա։

Մենք պետք է կարողանանք օձը բնում խեդդել։ Իսկապես, թունավոր օձ է, որի խայթոցից մեր ազգը կարող է մահանալ»,- ասաց Ավետիք Չալաբյանը։

Մենուա Սողոմոնյանը շարունակեց. «Եթե այս «Սահմանադրությունը» կյանքի կոչվի, պատմության մեջ մնալու է  որպես «ալիևյան սահմանադրություն», այսինքն ի՞նչ անում են գործող իշխանությունները, անում են «թուրքաքվե»։ Մենք ոչ ենք ասելու այդ թուրքաքվեին, պայքարելու ենք դրա դեմ, տապալելու ենք, թույլ չենք տալու  Հայաստանում լինի «ալիևյան սահմանադրություն»։  Հայաքվեի օրգանական շարունակությունը հենց դրա մեջ ենք տեսնում»։