Ձեր վստահելի աղբյուրը

««Քաղաքացիական պայմանագիրն»  իր տարբեր ներկայացուցիչներով ելնում է ու սկսում հերթական անգամ  կեղծիքներ, ստեր, իրականությունից կիլոմետրերով հեռու տեղեկություններ հնչեցնել ազգային ուժ Դաշնակցության հասցեին»,- Ազգային ժողովում իր ելույթում ասաց «Հայաստան» խմբակցության պատգամավոր ՀՅԴ-ական Արծվիկ Մինասյանը։

Նա նշեց, որ ՀՅԴ-ն մի ուժ է, որը 134 տարի  պայքարում է  հայ մարդու ազատագրության համար՝ տալով հազարավոր զոհեր, հանդես գալով միջազգային ասպարեզներում, պաշտպանելով հայոց պետականությունը, Հայաստանի Հանրապետությունը, Արցախի Հանրապետությունը, հայ մարդու արժանապատվությունը։

«Բայց միևնույնն է, դա էլ չի օգնում, որպեսզի  այդ մաղձը, որ կուտակվել է, անընդհատ փորձեն հանրությանը մոլորեցնեն։

Այսօր հերթական փուլը սկսվեց Մարիա Կարապետյանից։ Արփի Դավոյանն այստեղից կարդում է  Դաշնակցական առանձին գործիչների  գնահատականը միջանձնային հարաբերությունների վերաբերյալ։ Կարդացեք, հազարավոր էջեր կարդացեք, հրապարկեք, դրանից պատմության մեջ Դաշնակցության փառավոր էջը չի մարելու, չի խամրելու։

Ո՞վ է ասել, որ սխալները չպետք է վերլուծվեն։ Հակառակը։ Դրա համար էլ ասում ենք՝ սխալ թույլ մի տվեք։ Եթե մենք անցել ենք պատմական ընթացք, տեսել ենք  սխալներ, այսօր բարձրաձայնում ենք, ինչո՞ւ եք դուք կրկնում, գնում եք այդ ճանապարհով  որ ի՞նչ, ո՞ւմ ապացուցեք։

Պարոն Ալեն Սիմոնյանը ելել ու այստեղից ասում է՝ Արցախում դուք եկաք իշխանության, հանձեցիք։ Լավ, այդ աստիճան  սուտը ինչպե՞ս կարելի է  անընդհատ տարածել»,- ասաց ընդդիմադիր գործիչը։

Նա նշեց, որ պարտություն, կործանում բերած իշխանությունն իր ղեկավարով չի կարող աժանապատվորեն ներկայացնել պետությունը և սա պատմությամբ անցած, հազար անգամ հաստատված ճշմարտություն է. «Այդ ճշմարատությանն անընդհատ  գալ, գլխով դեմ տալ ու ասել՝ չէ, մենք ճիշտ ենք, դուք սրանով ոչ միայն տանում եք Հայաստանի երրորդ հանրապետությունը կործանման, պատմության երեսից էլ եք ջնջվելու»։

Արծվիկ Մինասյանը դիմելով ՔՊ-ական Վլադիմիր Վարդանյանին՝ ասաց.  «Կարելի է գաղափարական բանավեճ ծավալել, անհարեժշտ է,  բայց ո՞ւմ հետ։ Ո՞րն է  ձեր  գաղափարախոսությունը։ Մի հատ հրապարակեք դա, որովհետև Նիկոլ Փաշինյանն  ասում էր՝ մենք իզմեր չունենք։

Գաղափարախոսությունն առաջին հերթին իզմ է, եթե չկա իզմ, ինչի՞ մասին խոսենք։ Աթոռը պահելո՞ւ։ Դրա իմաստը ո՞րն է։ Մի հատ դուք ասեք՝ ո՞րն է  ձեր գաղափարախոսությունը, ինչո՞ւմն է կայանում  դրա էությանը, հայի ինքնությունը պահելու ձեր մոտեցումը ո՞րն է։ Բաց քամով ցլի դեմ դուրս գա՞լը։ Ո՞րն է, էլի։ Այս ձևակերպումները դուք չունեք։ Իրավիճակով պայմանավորված անընդհատ  ու ամեն անգամ մի նոր մեղավոր եք ման գալիս։

Հիմա էլ Սահմանադրության  նախաբանն ու հռչակագիրն եք մեղավոր ճանաչում։

Արցախցիները մեղավոր էին  Արցախի կորստի համար, նախկինները մեղավոր էին՝ պարտության համար, ռուսները մեղավոր էին՝ չպաշտպանելու համար, ամերիկացիները մեղավոր են սրա, նրա համար, դուք իսկի մեղավոր չե՞ք։ Հե՞չ չկա մեղավորություն։ Եթե կա, հեռացեք, փոխեք, փոխվեք, որպեսզի կարողանանք խոսակցություն ունենալ։

Մենք ի դեմս ձեզ գործ ունենք ոչ թե գաղափարախոսություն ունեցող, ընդհակառակը՝  գաղափարախոսություններ մերժող, ամեն ինչը ուրիշի  վրա բարդող, սեփական պատասխանատվությունից խուսափող վարչախմբի հետ»։