Բանակցություններում արդյո՞ք Արցախի ռազմաքաղաքական ղեկավարության խնդիրը շոշափվում է․ Գալստյանը՝ Փաշինյանին
Ադրբեջանի բանտերում պատանդառված հայ գերիներին ու Արցախում պատանդառված ռազմաքաղաքական ղեկավարության մասին ԱԺ-ում հարց ուղղեց «Հայաստան» խմբակցության պատգամավոր Լիլիթ Գալստյանը։
«Այս ընթացքում ականատես ենք եղել, որ Ադրբեջանը ՄԻԵԴ -ի և արդարադատության միջազգային դատարանների որոշումներն անտեսել է, նաև ականատես ենք լինում բազմաթիվ հայտարարությունների, որ իրենք խնդիրը ռազմական ճանապարհով են լուծել։ Այս պահին Հայաստանը եվրոպական դատարանում միջպետական չորրորդ գանգատն է ներկայացրել, ուր ներառված է Արցախի հետ առնչվող հարցերի մեծ համալիր, ուր ներառված են թե՛ 120 000 բռնի տեղահանվածների խնդիրը, թե՛ Լաչինի ապաշրջափակումը, մշակութային ժառանգության նկատմամբ վանդալիզմը, թե՛ Արցախի ռազմաքաղաքական ղեկավարության հարցը, ինչպես նաև՝ գերիների խնդիրը։ Ենթադրելի է, որ այս մեծ ծավալի պարագայում հարցի քննությունը բավական երկար ժամանակ պետք է առնի։ Արդյո՞ք նպատակահարմար չէր լինի, եթե Արցախի հանրապետության ռազմաքաղաքական ղեկավարության հարցն առանձնացվեր այս հայցից կամ գանգատից և այն ներկայացվեր առանձին, որպեսզի հանգուցալուծումն արագ ստանայինք։ Երկրորդ հարցը, պարոն Փաշինյան, քաղաքական ուղղությամբ ի՞նչ գործիքներ եք որդեգրել և արդյո՞ք բանակցային գործընթացում, որը մեզ կամ հանրությանը տեսանելի չէ, Արցախի հանրապետության ռազմաքաղաքական ղեկավարության խնդիրը շոշափվում է և ի՞նչ ակնկալիքներ կան այս կոնտեքստում»,- ասաց Գալստյանը։
Փաշինյանն արձագանքեց՝ նշելով, որ դատական գործընթացների մասին դիտարկումներն իրավական վերլուծության կարիք ունեն, ինքը պատրաստ չէ ասելու, թե իրավական առումով որ ճանապարհն ավելի էֆեկտիվ կլիներ։
«Դա պետք է իրավաբանները գնահատեն։ Ենթադրում եմ՝ համարել են ,որ այդպես է էֆեկտիվ»,- ասաց նա։
Ինչ վերաբերում է քաղաքական հատվածին, ապա Փաշինյանը պատասխանեց․ «Մեր բանակցություններում և շփումներում մշտապես գերիների, պահվող անձանց խնդիրն օրակարգում է և մենք այդ հարցերը քննարկում ենք, դնում ենք քննարկումների սեղանին։ Հասկանալի է, որ դա զգայուն հարց է։ Գերիների, պահվող անձանց հարցը շարունակում է մնալ մեր օրակարգում»։
Գալստյանն արձագանքեց․ «Ինչ վերաբերում է Արցախի ռազմաքաղաքական ղեկավարությանն, ապա սա բառացիորեն բոլորիս արժանապատվության խնդիրն է։ Կարծում եմ՝ հավելյալ ճիգեր գործադրելու և այն, որ միջազգային դատարանում գործերը կարող են տարիներ շարունակ ձգձգվել և, այս փաթեթում ղեկավարության խնդիրը ներառելը, մարտավարական առումով ճիշտ չէ։ Ես ուղղակի հորդորում եմ, խորհուրդ եմ տալիս իրավական կոնտեքստում քննարկել առանձնացնելու հնարավորությունը»։
Փաշինյանը պատասխանեց․ «Գերիների, պատանդների պահվող անձանց հարցը շատ էմոցիոնոլ կողմ ունի բոլորիս համար։ Ձեր ասածաը իրավաբանները կդիտարկեն, եթե տեսնեն նպատակահարմարություն, գուցե ձեր խորհուրդներից օգտվեն»։
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
