Ձեր վստահելի աղբյուրը

«Ինքը շատ ճիշտ հաղորդաշար էր ընտրել՝ «Հայու տեսակ»։ Խոսքն իր տեսակի մասին էր»,- «Կարին» ավանդական երգի-պարի խմբի հիմնադիր և գեղարվեստական ղեկավար, Գագիկ Գինոսյանի վերջին հրաժեշտի ժամանակ լրագրողների հետ զրույցում ասաց ԳԱԱ Պատմության ինստիտուտի տնօրեն, ԳԱԱ ակադեմիկոս  Աշոտ Մելքոնյանը։

Նա հիշեց, երբ ասում էին՝ Գագիկ, խոսքը քո տեսակի մասին է, ասում էր՝ ոչ, ես ուզում եմ ազգն այդ տեսակը դառնա։

«Վստահաբար  կարող եմ ասել, որ այդ տեսակը կայացել է։ Որքան էլ մենք այսօր ծանր վիճակում ենք ապրում՝  աշխարհաքաղաքական, մեր հայրենիքը վտանգված վիճակում է, բայց այդ տեսակը կա։ Այն գլխիկոր երիտասարդները, որոնք մտնում ու դուրս են գալիս խոնավացած աչքերով, այդ  տեսակը Գագիկ գինոսյանական տեսակն է, որն ապրում է  այսօր և այդ տեսակը պետք է ծլարձակի»,- ասաց Ա. Մելքոնյանը։

Նրա խոսքով, հանրային այսպիսի ճանաչում քիչ մարդկանց գիտի, ում հետքերը կարելի էր տեսնել ամենուր՝ Լոս Անջելեսից մինչև Սփյուռքի ցանկացած շրջան, Ռուսաստան, Արևմտյան Հայաստան, Արարատի գագաթ և, իհարկե, Արցախ։

«Ուներ կերպարներ, որոնց պաշտում էր՝ Հայրիկ Մուրադյան, Լեոնիդ Ազգալդյան, Գարեգին Նժդգեհ։
Շատ ափսոս։ Միակ մխիթարությունն այս հանրությունն է,  հայի այս տեսակը, որ հիմա ողբում է, ցավում է, բայց այդ կսկիծն ատամներով  սեղմելուց հետո մի օր պետք է պայքարի և Գինոսյանի հոգին անդրշիրիմյան աշխարհում նորից պետք է փառավորվի»,- ասաց Ա. Մելքոնյանը։