Ռուս-թուրքական մեղրամիսն այսօր չի սկսվել, այն սկսվել է շատ վաղուց. Ռուբեն Կարապետյան
«Մեր պետությունն հայտնվել է այնպիսի մի գոյութենական ճգնաժամի մեջ, որի իմաստավորելը և պատճառների գիտակցելը շատ կարևոր է, որպեսզի մենք կարողանանք ելքերը գտնել»,- «Հայաստանի հեռանկարը նոր տարածաշրջանում» թեմայով քննարկմանն ասաց դիվանագետ Ռուբեն Կարապետյանը։
Նրա խոսքով՝ պատճառների փնտրտուքն անհատների, կուսակցությունների ուղղությամբ տանելը մեզ ոչինչ չի տալու և իզուր էներգիա է վատնվելու։
«Մենք պետք է հասկանանք մի կարևոր բան, Հայաստանի գոյատևման համար անհրաժեշտ է տեսիլ, այդ տեսիլը բերող մարդիկ, որոնք կարող են այս խորքային ճգնաժամից հանել երկիրը»,-հայտնեց դիվանագետը՝ նշելով, որ տեսիլի բացակայությունն ավելի շատ գալիս է մեր մտածելակերպից, քան գիտելիքի պակասից։
Նրա խոսքով՝ հասարակական դեբատներում մշտապես քննարկվում են տարածաշրջաններից, աշխարհից, այլ պետություններից, բայց այնտեղ հայկական շահը չկա, Հայաստանն ու հայությունը չկա։
«Կա ռուսական շահ, ամերիկյան շահ, թուրքական շահ՝ այսօր շատ ընդգծված, բայց որտե՞ղ է այդ հայկական շահը։
Շատ կարևոր է որ մենք դնենք հայկական պետության ձևավորման, վերածննդի, ինչպես ուզում եք անունը դրեք, խնդիրը։ Հարցը 4-րդ հանրապետության մեջ չէ, այլ նոր Հայաստանի մեջ է, այն Հայաստանի մեջ, որը կկարողանա իր մեջ ուժ գտնել՝ սառը դատելով, առանց որևէ խմբակային, կուսակցական շահերի, նայել իր անցած ճանապարհին։ Քաղաքականության մեջ սեր չկա, քաղաքականության մեջ կա հստակ հաշվարկ»։
Նրա խոսքով՝ օրավա ախտորոշումն անելու համար պետք է համակարգային նայել պետության անցած ամբողջ ճանապարհին։
«Պառակտված հասարակության հարցը քննարկելիս կրկին չեն տեսնում հայկականը։ Արտաքին քաղաքականությունը սկսվում է տանը։ Հայաստանի դեպքում այս փոխկապակցվածությունն շատ ակնհայտ է...
Առաջին հերթին պետք է մաքրել մեր տունը։ Դրսում փոփոխությունները կսկսվեն, երբ որ մենք ուժեղ ներքին տուն ունենանք...
Անունը դրեք, քաոս, պառակտվածություն, թե Նիկոլ, միևնույնն է՝ մենք մեր տունը մաքրելու խնդիր ունենք»,- ասաց դիվանագետը, և նկատելով, որ քանի դեռ այն չարվի, չենք կարող հասկանալ թե ինչ է կատարվում շրջապատում, հավելեց. «Մենք այդպես էլ չհասկացանք, թե ինչ զարգացումներ տեղի ունեցան մեր հարևանությամբ։ Այսօրվա աշխարհաքաղաքական իրավիճակն էլ չենք հասկանում»։
Կարապետյանի կարծիքով, պետք է ներքինը մաքրել ռազմավարության, ազգային գաղափարախոսության հիման վրա և՝ կարճաժամկետ, միջնաժամկետ, երկարաժամկետ, բայց դրսին չճանաչելը մեզ թուլացնում է։
«Ռուս-թուրքական մեղրամիսն այսօր չի սկսվել, այն սկսվել է շատ վաղուց, այլ հարց է, որ մենք այն չէինք կարողանում գիտակցել։
Վրաստանի հեղափոխությունից հետո շատ բան էր փոխվել, առավել ևս 2008 թ. ռուս-վրացական պատերազմից հետո»,-հիշեցրեց դիվանագետը։
Նա ասաց, որ չենք հասկացել երբ աշխարհն ասում էր՝ ստատուս քվոն անընդունելի է, ինչը նշանակում էր, որ հարցը պետք է լուծվեր, այն չընկալվեց և եղավ երկու պատերազմ 2016թ-ին և 2020 թ.-ին։
Ռուբեն Կարապետյանի խոսքով, աշխարհաքաղաքական զարգացումները մեր տարածաշրջանում Հայաստանից կախված չեն եղել, բայց պետք էր դրանց նախապատրաստվել։
Հայտնելով, որ նոր աշխարհակարգ է ձևավորվում և փոթորկալից ծովում նավը խարիսխ չի գցում, որովհետև կկոտրվի՝ Կարապետյանը նկատեց. «Այսօր Հայաստանը պետք է իր բարեկամներին ներկայացնի իր հայկական օրակարգը և ասի՝ ինձ ժամանակ է պետք իմ տունը մաքրելու համար»։
Դիվանագետի կարծիքով՝ Հայաստանը պետք է «հեռահավասար» հարաբերություններ ունենա բոլոր ուժային կենտրոնների հետ։
Լրահոս
Տեսանյութեր
ՈՒՂԻՂ. Ազատ արձակել Բաքվում պահվող հայ գերիներին
