Ձեր վստահելի աղբյուրը

«Այո, Ղարաբաղի հարցը փակված է։ Այս բոլոր տարիներին Ռուսաստանը ջանքեր է գործադրել ղարաբաղյան հիմնախնդիրը խաղաղ ճանապարհով լուծելու համար։ Ցավոք սրտի, չստացվեց, այս թեման փակվեց սեպտեմբերին ռազմական գործողությամբ»,-«Իզվեստիա» թերթին տված հարցազրույցում հայտարարել է Ադրբեջանում Ռուսաստանի դեսպան Միխայիլ Եվդոկիմովը։

Նրա խոսքով, Ռուսաստանը միշտ էլ շատ կարևոր դեր է խաղացել կարգավորման հարցում և Ռուսաստանը պատրաստ է առավելագույն աջակցություն ցուցաբերել երկու կողմերի միջև խաղաղության պայմանագրի շուրջ բանակցություններում։

«Այժմ Հայաստանն ու Ադրբեջանը ուղղակիորեն փոխանակում են խաղաղության պայմանագրերի նախագծերը։ Այն, ինչ առաջարկում է ադրբեջանական կողմը, իմ կարծիքով, միանգամայն արդարացված են, ստանդարտ ձևակերպումներ և հոդվածներ, որոնք, որպես կանոն, գոյություն ունեն կողմերի միջև կնքված խաղաղության պայմանագրերում։ Եվ սկզբունքորեն, ելնելով այն առաջարկներից, որ անում է Բաքուն, ինձ թվում է, որ այդ բանակցությունները կարող են բավականին արագ ավարտվել»,-ասել է դեսպանը։

Ըստ դեսպանի՝ Մոսկվան պատրաստ է տրամադրել հարթակ, անհրաժեշտության դեպքում՝ փորձաքննությունը, տեքստի վերաբերյալ խորհուրդները։

Միխայիլ Եվդոկիմովը հայտարարել է, թե տեսնում եմ, որ Ադրբեջանը հաստատակամ է շատ արագ ավարտել խաղաղության պայմանագրի ստորագրման շուրջ բանակցությունները։

Անդրադառնալով Ադրբեջանի  արևմտյան հատվածը Նախիջևանին միացնող ճանապարհի հարցին, ՌԴ-ի դեսպանն ասել. «Այս թեման շատ կարևոր է ադրբեջանական կողմի համար։ Սա կայուն տրանսպորտային երթուղու, Ադրբեջանի հիմնական տարածքի և Նախիջևանի միջև տրանսպորտային ուղիների առկայությունն է։ Ղարաբաղյան առաջին պատերազմի ժամանակ բոլոր հաղորդակցությունները ընդհատվել են, իսկ Նախիջևան էլեկտրաէներգիայի մատակարարումը դադարեցվել է։ Ուստի Ադրբեջանի համար երթուղու անվտանգությունը (այն մոտավորապես 46 կմ է) վերացական թեմա չէ։

Այս երթուղու երկայնքով կան նաև թունելներ, և, իմ կարծիքով՝ նաև կամուրջ։ Ռուսաստանի Դաշնությունը պատրաստ էր իր միջոցներով բավական արագ վերականգնել այս երթուղին։ Տարբեր պատճառներով, որոնք ինձ այնքան էլ պարզ չեն, հայկական կողմը ձգձգում է բանակցությունները։
Արդյունքում, անցյալ տարի Բաքուն և Թեհրանը պայմանագիր ստորագրեցին Իրանի տարածքով երկաթուղու կառուցման մասին։ Այնտեղ մի քիչ ավելի երկար՝ 60 կմ, մի փոքր ավել։ Երթուղին ավելի բարդ է, բայց այս աշխատանքն արդեն ընթանում է։ Այս բոլոր տարիներին Ադրբեջանի և Նախիջևանի միջև ավտոմոբիլային բեռնափոխադրումները անցնում էին Իրանի տարածքով։

Սա նաև Թուրքիա տանող ճանապարհն է։ Հիմա գլխավորը Թուրքիայից Նախիջևան երկաթուղի կառուցելն է, նախատեսվում է կրկնակի գիծ՝ եվրոպական և խորհրդային։ Ըստ այդմ, մենք կկարողանանք Ռուսաստանից Թուրքիա ապրանքներ տեղափոխել Ադրբեջանի, Իրանի և Նախիջևանի տարածքով»։

Բաքվում ՌԴ դեսպանն անդրադարձել է նաև Արցախում ռուս խաղաղապահների կարգավիջակի և տեղակայման ժամկետների հարցերին։

«Թեման շատ կարևոր է։ Ռուսաստանի, Ադրբեջանի նախագահների և Հայաստանի վարչապետի 2020 թվականի նոյեմբերի հայտարարության մեջ Հայաստանի զինված ուժերի դուրսբերմանը զուգահեռ (հայտարարության չորրորդ կետն է) այնտեղ ռուս խաղաղապահներ են մտցվել՝ հինգ տարի ժամկետով: Այնտեղ բնակվում էր հայ բնակչությունը՝ տարբեր հաշվարկներով՝ 110-120 հազար մարդ։ Եվ խաղաղապահներն արդյունավետ կերպով կատարեցին իրենց գործառույթները՝ մի կողմից պաշտպանելով Ադրբեջանի այս տարածքը, մյուս կողմից, իհարկե, հայ բնակչության համար կարևոր էր, որ այնտեղ գտնվեին ռուս խաղաղապահներ՝ ապահովելու իրենց անվտանգությունը։

Իսկ այժմ ռուս խաղաղապահները ադրբեջանական ուժերի հետ միասին պարեկություն են իրականացնում տարածքում՝ պաշտպանելով շենքերն ու մշակութային կառույցները։

Մեր խաղաղապահ զորակազմի վերաբերյալ Մոսկվայի և Բաքվի միջև բանակցությունների հաջորդ փուլի ժամկետները ներկայումս համաձայնեցվում են Ադրբեջանի ԱԳՆ-ի հետ։ խաղաղապահների մնալու ժամկետը լրանում է 2025 թվականին»։