Ձեր վստահելի աղբյուրը

Ֆերմերները, ովքեր կառավարության կողմից նախապես հայտարարված աջակցության միջոցները համարում են անբավարար, գոմաղբ են լցրել Ֆրանսիայի Աժեն քաղաքում գտնվող բանկի մասնաճյուղի դիմաց։ «ՌԻԱ նովոստի»-ի փոխանցմամբ, այդ մասին հաղորդում է BFMTV հեռուստաալիքը։

«Չորեքշաբթի օրը՝ փետրվարի 14-ին, գոմաղբ է բեռնաթափվել Աժենի բանկի մասնաճյուղի դիմաց, և ֆերմերները խոստանում են առաջիկա օրերին տեղական մակարդակով հետագա քայլեր ձեռնարկել»,-հաղորդում է հեռուստաալիքը:

Նշվում է, որ բողոքի ակցիան տեղի է ունեցել մինչև ժամը 08.00-ը՝ երկրի երկրորդ խոշոր գյուղատնտեսական արհմիության՝ Coordination rurale-ի կոչով։

«Մենք թիրախավորեցինք բանկերը, քանի որ մեզ չլսեցին: Մենք խնդրեցինք (վարչապետին) Գաբրիել Աթալից դրամական միջոցներով աջակցել, բայց ոչինչ չհայտարարվեց... Այդ պատճառով, այսօր մենք թիրախավորելու ենք գերատեսչության բոլոր բանկերը՝ (Lot-et- Garonne ) ասելով, որ մեզ փող է պետք, մեզ թթվածին է պետք»,-BFMTV-ի եթերում ասել է արհմիության տեղական մասնաճյուղի համանախագահ Խոսե Պերեսը:

Նրա խոսքով, եթե իրենց կոչերը չլսվեն կառավարության կողմից, ֆերմերները նախարարների հետ հանդիպման կգան Գյուղատնտեսական միջազգային ցուցահանդեսում, որը կանցկացվի փետրվարի 24-ից մարտի 3-ը։