Իշխանությունները նաև թաթը դնում են արտագնա աշխատանքում մարդկանց քրտինքով աշխատած փողի վրա. Արթուր Խաչատրյան
Սոցիալական ցանցերում տեղեկություն է շրջանառվում, որ հազարավոր քաղաքացիներ, որոնք աշխատելու նպատակով Ռուսաստան են մեկնել գումար վաստակել և վերադարձել Հայաստան, նամակներ են ստացել ՊԵԿ-ից, որ 100 հազար դրամից մինչև 1 միլիոն դրամ հարկային պարտավորություն ունեն և պետք է վճարեն այդ գումարները։ Այն արվում է Հարկային օրենսգրքում կատարված փոփոխությունների շրջանակներում։
Պարզվում է, որ ԿԵԿ-ի կայքէջում և ֆեյսբուքյան պաշտոնական էջում հրապարակվել են համապատասխան իրազեկող հոլովակներ, որոնցում տեղեկացվում է, որ օտարերկրյա պետություններում ստացված եկամուտները ներառվում են ռեզիդենտ ֆիզիկական անձից եկամտային հարկով հարկման օբյեկտի մեջ և ենթակա են հարկման օրենսդրությամբ սահմանված կարգով չափով։ Օտարերկրյա պետությունում գանձված հարկերի չափը նվազեցվում է ՀՀ-ում հաշվարկված եկամտային հարկի գումարներից։ Իրազեկումներում նաև նկարագրվում է հարկատուի քայլերը։
Իրազեկող նյութերը հասանելի են հետևյալ հղումներով՝ https://www.facebook.com/watch/?extid=MSG-UNK-UNK-UNK-COM_GK0T-GK1C&mibextid=DrtuHo&v=1000567428035600, https://www.facebook.com/watch/?extid=MSG-UNK-UNK-UNK-COM_GK0T-GK1C&mibextid=DrtuHo&v=1000567428035600։
Սոցիալական հարթակների օգտատերերին նաև հետաքրքրում էր, թե որտեղից ՊԵԿ-ին արտերկրում աշխատողների տվյալները։ Պարզվում է, որ ԱՊՀ մասնակից պետությունների միջև հարկային օրենսդրության պահպանման և այդ բնագավառում խախտումների դեմ պայքարի հարցերով համագործակցության ու փոխադարձ օգնության մասին» 1999 թվականի հունիսի 4-ի համաձայնագրի մասնակից պետությունների կառավարությունները Աստանայում 2018 թվականի նոյեմբերի 2-ին կնքել են «Հարկային վարչարարություն իրականացնելու նպատակով ԱՊՀ մասնակից պետությունների միջև էլեկտրոնային եղանակով տեղեկություն փոխանակելու մասին» արձանագրությունը, որը Հայաստանի Հանրապետությունում վավերացվել է 2020թ. փետրվարի 12-ին:
Երևույթը գնահատելու համար Panorama.am-ը դիմեց ԱԺ «Հայաստան» խմբակցության պատգամավոր Արթուր Խաչատրյանին։
«Այն, որ ՊԵԿ-ից գնացել են ծանուցումներ, տեղյակ չեմ, բայց չեմ կասկածում։ Մենք դրա մասին զգուշացնում էինք, դեռ այն ժամանակ, երբ այս իշխանությունները համընդհանուր հայտարարագման համակարգն էին մտցնում։ Մենք ասում էինք, որ այն չեն անում ուղղակի հետաքրքրությունը բավարարելու համար։ Այլ այն անում են, որպեսզի հարկեն երկու հիմնական սեգմենտ՝ արտագնա աշխատողներին և գյուղացիներին։
Իհարկե, իշխանություններն ասում էին, որ այն դրա հետ որևէ կապ չունի, բայց ընդունում էին, որ ցանկացած եկամուտ պետք է հարկվի։ Այնպես որ, այն ինչը մենք զգուշացնում էինք դեռ 3 տարի առաջ, այսօր իրականություն է դառնում։
Երկիրը պետք է իր քաղաքացիների համար սեփական երկրում պայմաններ ստեղծի, որպեսզի մարդը կարողնա աշխատել, գործատուն աշխատանք ստեղծի, աշխատավորն աշխատի։
Այս իշխանությունները որևէ բան չեն անում, մարդիկ ճարահատյալ գնում են արտագնա աշխատանքի, թողնում են իրենց ընտանիքները տարվա մեծ մասը՝ մինչև 9 ամիս, տառապում են, երկու կոպեկ փող են աշխատում, որպեսզի ընտանիքն ապրի, հիմա այս իշխանությունները նաև թաթը դնում են մարդկանց քրտինքով աշխատած փողի վրա՝ առանց որևէ կերպ օգնելու այդ մարդկանց երկրում մնալու և աշխատելու։ Այդ մոտեցումը մեր համար ուղղակի ընդունելի չէ։
Այս իշխանությունները հայտարարում են, որ իրենք փողի կարիք չունեն, բայց այս դրակոնյան օրենքներն ու վարչարարությունը ցույց են տալիս, որ իրենք իրոք փողի կարիք ունեն։ Այն փողը, որ գալիս էր դրսից՝ այս իշխանություններից անկախ պատճառներով, ցամաքելու վրա է և դրա համար էլ նրանք արդեն սկսում են նաև նեղել արտագնա աշխատողներին։ Այս ամենի արդյունքը կլինի այն, որ այս մարդիկ կգնան, ընտանիքներին էլ կտանեն հետները և էլ հետ չեն գա»,- ասաց Արթուր Խաչատրյանը։
Հարակից հրապարակումներ`
- Արտագնա աշխատանքի մեկնած մեր հայրենակիցների իրավունքները կլինեն առավել երաշխավորված. ՄԻՊ
- Արտագնա աշխատանքի մեկնած քաղաքացիների եկամուտների հարկման որևէ նախագիծ կամ գաղափար առկա չէ. ՊԵԿ պարզաբանումը
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
