Ձեր վստահելի աղբյուրը

ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովը հրավիրել էր աշխատանքային քննարկում, որի օրակարգում  կառավարության հեղինակած  «Թանգարանների մասին» առաջին ընթերցմամբ ընդունված օրենքի նախագիծն էր:

ԱԺ-ից հայտնում են, որ քննարկմանը մասնակցում էին հանրապետական, մարզային, համայնքային ենթակայության, մասնավոր թանգարանների, բուհերի, Հայ առաքելական եկեղեցու, ԿԳՄՍ նախարարության պատասխանատու ներկայացուցիչներ, ոլորտի մասնագետներ:

Բացելով քննարկումը` հանձնաժողովի նախագահի տեղակալ Թագուհի Ղազարյանը հայտնել է, որ նախագծում արդեն ավելացվել  են որոշ հոդվածներ, որոնք վերաբերում են թանգարանների հավատարմագրման հարցին, թանգարանային կրթությանը, ինչպես նաև լրամշակվել է  ձեռնարկատիրական գործունեությանն առնչվող հոդվածը: Հստակեցվել են թանգարանների աշխատակիցների իրավունքներն ու պարտականությունները, կառավարման համակարգում տեղի ունեցող փոփոխությունները:

ԿԳՄՍ նախարարի տեղակալ Ալֆրեդ Քոչարյանը քննարկման մասնակիցներին կոչ է արել ներկայացնել առաջարկներն ու դիտողությունները, որոնք  ընդունելի լինելու դեպքում կներառվեն նախագծում:

Քննարկման մասնակիցները ներկայացրել են բազմաթիվ  առաջարկներ, դիտողություններ եւ մտահոգություններ, նշել նախագծում առկա բացթողումները, ընդգծել ոլորտը կարգավորող օրենք ընդունելու հրատապությունը:

Առաջին ընթերցմամբ ընդունված օրենքի նախագծի լրամշակված տարբերակը հանձնաժողովը նախատեսում է քննարկել առաջիկա նիստում: