Ձեր վստահելի աղբյուրը

Պաշտպանության նախարարության տեղեկատվության և հասարակայնության հետ կապերի վարչության նախկին պետ Գևորգ Ալթունյանն ազատվել է տնային կալանքից: Panorama.am-ին տեղեկացրեց Գ.Ալթունյանի շահերի պաշտպան Սիրանուշ Սահակյանը:

«Նախորդիվ ժամանակահատվածում կալանք էր, որը փոխարինվել էր տնային կալանքով։ Տնային կալանքը ևս երկու ամսով երկարաձգելու վերաբերյալ վերջին միջնորդությունը  դատարանը մերժեց, և այս պահին Գևորգ Ալթունյանը գտնվում է ազատության մեջ»,- ասաց նա։

Որոշումը կայացրել է Հակակոռուպցիոն առաջին ատյանի դատարանի դատավոր Վահե Դոլմազյանը։

«Գևորգ Ալթունյանի նկատմամբ ի սկզբանե տնային կալանքի հետ կիրառված է եղել գրավ՝ 20 միլիոն դրամի չափով, նաև ստորագրություն չհեռանալու վերաբերյալ»,- ասաց փաստաբանը։

Սիրանուշ Սահակյանը տեղեկացրեց, որ կալանքի և տնային կալանքի մասով բողոքներ ներկայացրել են, ունեն անգամ բողոք ներկայացված ՄԻԵԴ. «Նախ, կարծում ենք, որ հիմնավոր կասկածի ապացուցողական շեմը հաղթահարված չէ, առնչությունը հիմնավորող  ապացույցները բացակայել են, որի պարագայում առհասարակ չէր կարող կիրառվել խափանման միջոց։ Բայց այս դեպքում կիրառվել են ծանր խափանման միջոցներ»։

Հիշեցնենք, որ Գևորգ Ալթունյանը, Dasaran.am կայքի հիմնադիր Սուրեն Ալոյանը ու ևս 3 անձ, մեղադրվում են ՊՆ գնումների գործընթացի արդյունքում փաստաթղթերում կեղծ տեղեկություններ զետեղելու եղանակով պետությունից 106 մլն 300 հազար դրամ հափշտակելու մեջ։

Սիրանուշ Սահակյանն ասաց, որ Գևորգ Ալթունյանը, բնականաբար, չի ընդունում իրեն առաջադրված մեղադրանքը։

«Չափազանց աբսուրդ մեղադրանք է ներկայացված։ Մեղադրում են մի ծրագրի չմատուցման մեջ, որը նախ գոյություն ունի, երկրորդ՝ պետք է հստակեցվի նաև պարոն Ալթունյանի դերը։ Պատվիրատուն եղել է պաշտպանության նախարարությունը, գիտենք, որ այն շատ հիերարխիկ է։ Այո, գաղափարական առումով իրավատեր է պարոն Ալթունյանը, ի սկզբանե թվայնացման, դրա միջոցով կոռուպցիոն երևույթների  կանխման լուծումներ առաջարկել է, անխուսափելիորեն շփվել է նաև կատարող կազմակերպության հետ, սակայն ինչում մեղադրում են,  անհեթեթություն է։

Ծրագիրը գոյություն ունի,  այն ներկայացվել է  նաև դատարանում, անգամ այդ պայմաններում ծրագրի չգոյության համար անձին մեղադրանք են ներկայացրել»,- ասաց պաշտպանը։

Հարցին՝ ի՞նչ նպատակ է հետապնդում Գևորգ Ալթունյանին մեղադրանք առաջադրելը, Ս. Սահակյանը պատասխանեց. «Խնդիրը բազմաշերտը է։ Ի սկզբանե սահմանափակվել է տեղեկատվությունը, պարոն Ալթունյանի շփումն արտաքին աշխարհի հետ, ընդհուպ մինչև ընտանիքի անդամների հետ։ Հաշվի առնելով, որ պետական գաղտնիք հանդիսացող տեղեկություններ կան, որոշակի առումով սահմանափակվել է իրավաբանական թիմի ազատությունը, բայց, վստահ եմ, որ որոշակի փուլում ավելի հստակ և ուղիղ ենք  հաղորդակցվելու  հանրության հետ և կհստակեցնենք մեր դիրքորոշումը, թե ինչ շարժառիթներով կարող էր այս հետապնդումը նախաձեռնված լիներ»։