Ձեր վստահելի աղբյուրը

 «Ես՝ Արամ Գասպարի Սարգսյանս, պահանջում եմ Նիկոլ Փաշինյանի հրաժարականը»,- Փաշինյանի հրաժարականի պահանջով Ազատության հրապարակում մեկնարկած հանրահավաքին  իր ելույթի նախաբանում ասաց  «Միասին» շարժման համակարգող Արամ Սարգսյանը։

Նրա խոսքով՝ անհրաժեշտ է, որ բոլորը միասնական ձևով հաստատեն՝  ՀՀ  կայուն պետություն  է և  որևէ մի «մուտիլովչիկ» չի կարող այս պետությունը տապալել։

«Ես այսպիսի մարդ, ինչպիսին Նիկոլ Փաշինյանն է, իմ կյանքում երբեք չեմ հանդիպել ։ Մարդը կարող է այսօր սուտ ասել, հաջորդ օրը  մի այլ սուտ, մոլորեցնել  ժողովրդին, նույն ջանասիրությամբ փորձել հաստատել,թե ճիշտ է, հետո նորից հետ կանգնել իր խոսքերից։ Նա հայտարարեց,թե Արցախը Հայաստան է և վերջ, հաջորդ օրերին դարձավ Ադրբեջանի դատապաշտպանը, ադվոկատը և սկսեց ասել,թե  Ադրբեջանը ոնց պետք է հաստատի՝ Արցախն իրենն է։ էլ հնարեց Ալմաթիի այսպես կոչված՝ հռչակագիրը։ Այդ հռչակագիրը, ինքն էլ է դա հասկանում, որ նրա համար էր, Խորհրդային միության փլուզումից հետո պետությունները կարողանան ինչ-որ մի կազմակերպական ձև ունենալ։Այս մարդը հատուկ է սուտ ասում, որպեսզի համոզի Ալիևին, որ նա հանդես գա այս տեսակետից։ Ասում եմ ՝ բարեկենդանի նման ասի՝ արի յուղն ու բրինձը տար, ասում է՝ Արցախը տարել ես, արի Հայաստանն էլ տար, որովհետև նա ասում է «արևմտյան Ադրբեջան», սա էլ ոչ մի ձևով չի հակադրվում։ Այս անձի կառավարման ընթացքում որևէ ռեալ հաջողության չենք հասնելու, հետևապես պարտավոր ենք այս հրապարակն ամբողջովին լցնել»,- շարունակեց  Սարգսյանը։

Նա խոսքով՝ կա երկու խնդիր՝ միավորում Հայաստանում և երկրորդը՝ Սփյուռքում։ Քաղաքական գործիչը շեշտում է, որ Հայաստանը չպետք է կատարի թուրքի պահանջները։

«Բա մենք էն ազգն ենք, որ համակերպվենք թուրքի պահանջները կատարելուն, մենք էդ ժողովուրդն ենք, որ հանդուրժենք՝ թուրքը պետք ա որոշի,թե մենք Սահմանադրություն ինչ գրենք, որ ազգային հռչակագիրը հանենք։  Դուք հասկանում եք, 40 երկիր ճանաչել է Հայոց ցեղասպանության փաստը, դուք պատկերացնո՞ւմ եք,որ Հայաստանը դրանից հրաժարվի, դրանից ավելի մեծ նսեմացում կա՞։ Մենք այդ իրավունքը չունենք»,- ասաց Սարգսյանը։

Նա նաև ընդգծեց՝ Արցախը պետք է դառնա Հայաստան և վերադառնա մայր Հայրենիք։
«Խաղաղություն պահանջելով, պետք է հզորանալ այնպես, որ քո թշնամին քեզնից վախենա։ Մենք ձեզ խոստանում ենք, որ մեզանից ինչ կախված է անելու ենք , որպեսզի հասնենք գլխավոր նպատակին՝ սրանց պետք է հեռացնել իշխանությունից և ձևավորել մեր ազգային մտածելակերպին հարիր իշխանություն։Սա է մեր նպատակը»։

Անդրադառնալով առաջիկա անելիքներից, Արամ Սարգսյանը ներկաներին տեղեկացրեց, որ հաջորդ հանդիպումը նախատեսված է փետրվարի 29-ին, ժամը 17,00-ին, Ազատության հրապարկում։