Ձեր վստահելի աղբյուրը

ԱԺ Տնտեսական հարցերի մշտական հանձնաժողովը «Հայաստան» խմբակցության պատգամավոր Թադևոս Ավետիսյանի առաջարկով այսօր հրավիրել է լսումներ տեղական տուրքերի և վճարների բարձրացման հետևանքով առաջացած խնդիրների վերաբերյալ։

Օրենքով, Երևանի քաղաքապետարանի որոշումներով սահմանված կարգավորումները կառուցապատողների համայնքում առաջացրել են տարակուսանք և զարմանք, իսկ առանձին կառուցապատողների համար կարող են հանգեցնել տնտեսական ծանր հետևանքների:

Ինչպես հայտարարեց հանձնաժողովի նախագահ Բաբկեն Թունյանը, լսումներին հրավիրվել են մասնակցելու «Կառուցապատողների հայկական ասոցիացիա»  ՀԿ-ն, ինչպես նաև դրա կազմի մեջ չմտնող առանձին տնտեսվարողներ, Գործատուների հանրապետական միության նախագահը, «Կոնցեռն Դիալոգ» փաստաբանական գրասենյակի,  Երևանի քաղաքապետարանի, կառավարության և այլ մարմինների ներկայացուցիչներ։

«Շինարարության ոլորտում տուրքերի ավելացումը որոշակի և օբյեկտիվ դժգոհություններ է առաջացրել։ Խնդիրը միայն կառուցապատողին չի վերաբերում, գործ ունենք նաև բնակարանային ապահովման հարցի հետ։ Տուրքերի ավելացումն իր ազդեցությունն է թողնում շինարարության ծախսերի, ինչպես նաև վաճառքի գնի վրա։ Պետք է քննարկել հարցը նաև այս ասպեկտով, թե տուրքերի բարձացումն ինչ ազդեցություն կունենա անշարժ գույքի շուկայում»,-ասաց ԱԺ պատգամավոր Թադևոս Ավետիսյանը։

Նա առաջարկեց՝ քննարկման առարկա դարձնել նաև պետական տուրքերի վերաբերյալ ռազմավարությունը, եթե իհարկե, կա այդպիսին։

«Ինչպես են այդ չափերը որոշվում, որքանո՞վ են հիմնավոր»,-ասաց նա՝ ավելացնելով, որ կառուցապատողները նաև հանրային ծառայություն մատուցող ընկերությունների բաժանորդ դառնալու խնդիրների մասին են բարձրաձայնում։ Պատգամավորն ասաց՝ սեփական օրինակով վերջերս տեսել է, թե ինչ լուրջ խնդիր է այն։

«Կառուցապատողների հայկական ասոցիացիա»  ՀԿ նախագահ Գուրգեն Գրիգորյանը քննարկմանը ներկայացել էր կազմակերպության կողմից կատարված հաշվարկներով, որոնք բաժանվեցին լսումների մասնակից անձանց։

Գրիգորյանն ընդգծեց՝ կառուցապատողների համար առկա խնդիրները բաժանվում են երկու խմբի՝ ինստիտուտցիոնալ ու տեղային բնույթի։

«Տեղային բնույթի խնդիրներն են Երևան քաղաքի ավագանու կողմից տեղական տուրքերի և վճարներ սահմանող իրավական ակտերը, որոնք վերաբերում են Երևան քաղաքին։ Կան նաև հանրապետական մաշտաբի խնդիրներ, որոնց հանդիպում են կառուցապատողները թե Երևանում, թե դրանից դուրս աշխատանքների իրականացման ժամանակ»,-ասաց Գրիգորյանը։

«Կառուցապատողների հայկական ասոցիացիա» ՀԿ խորհրդի անդամ Արմեն Սաքապետոյանն իր խոսքում հիշեցրեց՝ ուղիղ մեկ տարի առաջ սկսեց շրջանառվել  «Տեղական տուրքերի  մասին» ՀՀ օրենքում փոփոխություններ կատարելու մասին նախագիծը, որով նախատեսում էր շինթույլտվության համար նախատեսված գործող տուրքը փոխել։

«Այն հիմնավորվում էր այսպես, դրա արդյունքում պետք է ուժեղանան ՏԻՄ հզորություններն ու կառուցապատողներին, տնտեսվարողներին ավելի որակյալ ծառայություն են մատուցելու։  Փոփոխությունն ուժի մեջ էր մտնելու անցած տարվա հուլիսին, հետաձգվեց մինչև այս տարվա հունվար։ Մենք ակնկալում էինք, որ ՏԻՄ-երի կողմից մատուցվող ծառայությունները կլավարկվեին տուրքերի ավելացման հաշվին։ Հետո շրջանառության մեջ դրվեցին տարբեր փուլերի համար սահմանված վճարներ, օրինակ, ՃՀԱ-ի ի կազմման  վճար։ Նույնիսկ անդրադարձ չեղավ այն նախագծերին, որոնք մեկնարկել էին, երբ ներդրումներն արդեն արվել էին»,-ասաց Սաքապետոյանը։
 

Նա ընդգծեց, որ կառավարության որոշմամբ ՃՀԱ-ի տրամադրումն անվճար է, մինչդեռ ավագանիների որոշումներով վճարները գործում են ոչ միայն Երևանում, այլև օրինակ, Ծաղկաձորում։ Փաստացի, առկա է մի իրավիճակ, երբ ՏԻՄ ավագանու որոշումները հակասում են կառավարության որոշմանը։

ՀԿ անդամներն այդ առումով նաև անհասկանալի են համարում, թե ինչպես են հաշվարկվում այս տուրքերն ու վճարները։

«Մենք երբեք չենք անդրադարձել աղբահանության վճարին, քանի որ դրա տակ կա հաշվարկ։ Իսկ այս վճարների դեպքում մեզ որևէ հաշվարկ հասանելի չէ, ինչո՞ւ է օրինակ բազային վճարը 4 մլն դրամ կամ բազային տուրքը 7 մլն դրամ, կամ ի՞նչ տրամաբանությամբ է արվել գոտիականությունը»,-ասաց նա։

Այս ամենի հետևանքով, ըստ բանախոսի,  մի շարք հակասություններ են առաջացել։ Օրինակ, ասում են՝ Կենտրոնում կառուցապատումը չի խրախուսվում, մինչդեռ շահույթի առումով, ճիշտ հակառակ տրամաբանությունն է։

 «Մի կողմ դնելով այն, որ կառավարության որոշումը հակասում է ավագանու որոշմանը, մեզ մոտ ստացվել է մի իրավիճակ, երբ Կենտրոնում՝ առաջին երեք գոտիներում կառուցապատում իրականացնելն ավելի գրավիչ ու շահութաբեր է, քան մյուս գոտիներում»,-ասաց Արմեն Սաքապետոյանը։

_{Հաշվարկն իրականացրել է «Կառուցապատողների հայկական ասոցիացիա»  ՀԿ-ն։}

Ներկայացվող հաշվարկների համաձայն, ըստ գոտիների թե՛ նախագծման թույլտվության /ՃՀԱ/ վճարի, թե՛ շինարարության թույլտվության տուրքի, թե՛ շինարարության թույլտվության ժամկետի երկարաձգման տուրքի կշիռը կանխատեսվող նախահաշվային շահույթում գոտուց գոտի տարբեր է մինչև 10 անգամ՝ ոչ համամասնորեն, նախահաշվային շահույթում առավել նվազ տուրքի դրույքաչափեր են սահմանվում 1-ին և 2-րդ գոտիներում, առավել բարձր դրույքաչափեր՝ 5-9 գոտիներում:

Սաքապետոյանի  խոսքով, շուտով Երևանում չի գործի նաև եկամատահարկի վերադարձի օրենքը, ինչի հետևանքով շուկայում էական անկում է նախատեսվում, այն մեղմելու համար միջոցառումներ են հարկավոր։

Ամփոփելով խոսքը, ՀԿ  խորհրդի անդամն ընդգծեց՝ տուրքերի, վճարների ավելացումը, հանրային ծառայություններ մատուցող կազմակերպությունների կողմից սակագների բարձրացման արդյունքում առաջիկայում ունենալու ենք բնակարանների՝ առնվազն 10-15 տոկոսով գների աճ։

«Սա ենթադրում է, որ այն ընտանիքները, որոնք ունեն 800 հազարից մինչև 1 մլն եկամուտ, նրանց էլ այլևս հասանելի չեն լինելու բնակարանները։ Սա է ամբողջ խնդիրը»,-ասաց Ա. Սաքապետոյանն ու ավելացրեց, որ իրավիճակից բխող միջացառումներ են առաջարկել, որոնց մեծ մասը չի ընդունվել։