Արտագնա աշխատողներին որոշակի ժամանակով կարող ենք Հայաստանում չհարկել. Ռուստամ Բադասյան

Հասարակություն 11:28 23/02/2024 Հայաստան

Արտագնա աշխատողներին որոշակի ժամանակով կարող ենք Հայաստանում չհարկել. Ռուստամ Բադասյան

«Ոչ մի տրամաբանություն չկա, որ որևէ մեկն ասում է, որ ինքը չի ուզում հարկ վճարել, մենք բոլորս պետք է հարկ վճարենք»,- կառավարության նիստում հայտնեց Նիկոլ Փաշինյանը՝ անդրադառնալով Գեղարքունիքի մարզում արտագնա աշխատաողների բողոքի ակցիային, որոնք դժգոհում էին, որ ՊԵԿ-ից եկամտահարկ վճարելու ծանուցումներ են ստացել։

Նա հայտնեց, որ հարկային վարչարարությունը պետք է արդար լինի, բայց հարկ բոլորն են վճարելու։

«Հիմա բոլորը կարող են ասել՝ բա Հայաստանում էդքան ստվերային աշխատող կա, ինչի՞ եք մեզնից հարկ վերցնում»,- հայտարարեց Փաշինյանը:

ՊԵԿ նախագահ Ռուստամ Բադասյանն էլ ասաց, որ հայտարարագրման համակարգի փուլային ներդրումով, որն ամբողջական կներդրվի 2026-ից, թիրախավորում են տարբեր հարաբերություններ։

«Ինչպես վարձակալության հարաբերություններն ենք լուծել, այնպես էլ փորձում ենք և փուլ-փուլ գնում ենք գանձման ճանապարհով, որ բոլորը վճարեն եկամտային հարկերը:

Քանի որ սովորույթի ուժով երբևէ նման հարկային պարտավորություններ չեն հայտարարագրվել և եկամտային հարկ չի վճարվել, նաև այս դեպքում որոշակի տույժեր են հաշվարկվել:

Կարծում ենք, որ մենք կարող ենք որոշակի օրենսդրական փոփոխություններով մեղմել, վերացնել այս ազդեցությունները և գնալ փուլային տարբերակով, հայտարարագրման համակարգի սահուն ներդրման ուղղությամբ: կառավարության գործընկերների հետ քննարկելով եկել ենք եզրակացության, որ այս փուլում եթե ստանում ենք տեղեկատվություն օտարերկրյա պետությունում ստացած եկամտի և վճարված հարկերի մասին, ապա տարբերությունն առնվազը որոշակի ժամանակով կարող ենք Հայաստանում չհարկել՝ արձագանքելով նաև այս դժգոհությունների օբյեկտիվ հատվածին»,-ասաց Բադասյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: