Ձեր վստահելի աղբյուրը

«2023 թվականի հունիս ամիսն ՆԳՆ-ն ջրային պարեկների համար 40 համակարգչային պլանշետների ձեռքբերման նպատակով՝ նախահաշվարկային գին սահմանելով  15 մլն 760 հազար դրամ, կամ մեկ հատի արժեքն 394 հազար դրամ»,-ԱԺ ֆինանսավարկային և բյուջետային հարցերի ու պաշտպանության և անվտանգության հարցերի մշտական հանձնաժողովների համատեղ նիստում հայտնեց  Հաշվեքննիչ պալատի անդամ Կարեն Կարապետյանը՝ ներկայացնելով  «Ներքին գործերի նախարարությունում 2023 թվականի պետական բյուջեի ինն ամիսների կատարման հաշվեքննության արդյունքների վերաբերյալ» Հաշվեքննիչ պալատի ընթացիկ եզրակացությունը։

Նա տեղեկացրեց, որ աճուրդին մասնակցել են երկու ընկերություն «ԳԳԵ հոլդինգ» ՍՊԸ-ն ու «Էլ Մարկետ» ՍՊԸ-ն, և նվազագույն գին էր սահմանվել 393,99 հազար դրամ, այսինքը 0.01 դրամ պակաս նախահաշվարկային արժեքից։

«Այս մասով հաստատվեց հանգամանքը, որ «Էլ Մարկետ» ՍՊԸ-ին փոխկապակցված «Էլդորադո» էլեկտրոնային հարթակը նույն պլանշետը հատավաճառով վաճառում է 286 հազար 900 դրամով, մանրածախի մասին է խոսքը,  այսինքը՝ 107 հազար դրամով պակաս, քան ոստիկանությունը»,- ասաց Կարապետյանը։

Նրա խոսքով՝ 40 պլանշետի մեջ 4 մլն 280 հազար դրամի տարբերություն է արձանագրվել և բացի այդ մրցույթի ժամանակ պարամետրեր են պարտադիր սահմանվել, որոնք միայն «Սամսունգ» ընկերության պլանշետներին է բնորոշ, այսինքն ուղղորդում է եղել, որը գնումների գործընթացով անհամապատասխանություն է։

«Նույն պլանշետը նույն մատակարարից, նույն արժեքով գնվել են նաև 2023 թվականի հունվարին ՝ 200 հարտ, 393,99 հազար դրամով, այստեղ արդեն տարբերությունը շուրջ 26 մլն դրամ է»,-ասաց Հաշվեքննիչ պալատի անդամը՝ հավելելով, որ «Սամսունգ» ընկերության Մեծ Բրիտանիայի հարթակում նույն պլանշետը վաճառվում է 233 900 դրամով և արդյունքում հաշվարկվել է 30 մլն-ը գերազանցող հավելյալ ծախս։

ՆԳՆ ներկայացուցիչը պատճառաբանեց, որ հավելյալ գումարը սպասարկման ծախսերի համար է, իսկ ընկերության հարթակում վաճառված պլանշետները 2-3 հատ են եղել և գովազդի համար ինքնարժեքից ցածր է վաճառվել։