Ձեր վստահելի աղբյուրը

«Ցանկացած բանակցություններ ավելի ընդունելի են, քան պատերազմական գործողությունները»,-մեկնաբանելով Գերմանիայում տեղի ունեցած բանակցությունների արդյունքները՝ ասաց «Հայաստան» խմբակցության ղեկավար Սեյրան Օհանյանը։

Նա նշեց, որ փորձը ցույց է տալիս, որ երբ բանակցային գործընթացները 2018 թվականից սկսածձախողվել են, 2020 թվականին բախվել ենք պատերազմի հետ, և այդ տեսանկյունից հանդիպումները կարևոր են։

Օհանյանը հայտնեց , որ Հայաստանի և Ադրբեջանի բարձրագույն ղեկավարների հանդիպումից հետո հասարակությունը տեղեկացավ, որ պայմանավորվել են ընդամենը  բանակցությունները շարունակելու մասին հերթապահ արարողակարգային հայտարարություններ անել։

«Հայաստան» խմբակցության ղեկավարը նկատեց, որ ադրբեջանցիներն անընդհատ պնդում են, որ մեզ որևիցե միջնորդ պետք չէ, որպեսզի կարողանան միայնակ ճնշումներ գործադրեն Հայաստանի Հանրապետության վրա։

«Մյուս կողմից էլ նրանք շատ խելոք, խորամանկ կերպով օգտագործում են թե՛ արևմտյան հարթակը, թե՛ հետխորհրդային հարթակը, որպեսզի իրենց շահերն առաջ տանեն»,-ասաց բանախոսը։

Հայտարարելով, որ Արևմուտքում ունենք բարեկամ երկրներ, բայց նրանք մեծ հնարավորություններ չունեն տարածաշրջանում աջակցություն ցուցաբերելու համար, բացի հատվածական դիտորդական առաքելությունից՝ Օհանյանը հավելեց. «Այդ բանակցություններից գլոբալ առումով արդյունքներ ակնկալելն այնքան էլ իրատեսական չէ»։

«Հայաստան» խմբակցության ղեկավարն անդրադարձավ հարցին, թե ինչ պայմանագրի հիման վրա են ՌԴ զինված ուժերը գտնվում Ներքին Հանդում։

Նա ենթադրեց, որ եթե գրավոր պայմանավորվածություն չկա, ինչի մասին հայտարարեց փաշինյանը, ապա նշանակում է բարդ իրավիճակում ՀՀ իշխանություններն ասել են, որ ՌԴ սահմանապահ ուժերը կարող են գնալ այնտեղ տեղակայվել։

«Ես զարմանում եմ մի բանի վրա, որ Հայաստանի Հանրապետությունում հնարավոր է նոյեմբերի 9-ից հետո բանավոր հրահանգ տալ և ասել՝ զորքերը հետ քաշեք մինչև ՀՀ սահման, երբ պայմանավորվածություն կար զորքերը կանգնեցնել այնտող, որտեղ մարտական գործողություններն ավարտվել են։ Զարմանում եմ, որ ՀՀ իշխանությունները չգիտեն, թե ինչ՝ բանավոր, թե գրավոր պայմանավորվածություննրի հիման վրա են ՌԴ սահմանապահները գտնվում  այնտեղ»,- ասաց Օհանյանը։

Նա նկատեց, որ այդ  խոսակցությունը սկսվեց այն ժամանակ երբ ԱԽ քարտուղարը  հայտնեց, թե ՌԴ սահմանապահները ոչինչ չեն արել Ներքին Հանդում  միջադեպը կանխելու և թոյլ չեն տվել, որ այնտեղ այցելեն ԵՄ դիտորդները։

Հայտնելով, որ տեղում ՀՀ ԶՈւ պատասխանատուները պետք է գնահատեին իրավիճակը և համապատասխան գործողություն անեին, ոպրեսզի կանխէին միջադեպը՝ ՀՀ պաշտպանության նախկին նախարարն ասաց. «Մենք 4 զոհ չէինք ունենա, ինչպես ադրբեջանցիներն անօրեն կերպով սադրանք իրականացնելով պատժեցին մեր ստորաբաժանմանը և ամենակարևորը՝ այդ պատժելու գործողություններից հետո հակագործողություններ մեր կողմից չեն իրականացվում։  Ադրբեջանցիները գնալու են սադրանքների մեր սահմանների մեր ԶՈւ-երի նկատմամբ այնքան, որքան զգան, որ մենք թույլ ենք։ Մեր շահերն առաջ տանելու, ավելի անվտանգ լինելու խաղաղություն պահպանելու այլընտրանքն՝  ուժեղ բանակ և ուժեղ սահմաններ ունենալն է»։