Ձեր վստահելի աղբյուրը

«Լրագրողների, փաստաբանների, բնապահպան-ակտիվիստների նկատմամբ քրեական հետապնդումները ողջ աշխարհում դատապարտելի են։ Նույնիսկ տարբեր միջազգային կազմակերպություններ գրանցում են նման դեպքերն ու հետևում դրանց ընթացքին։ Շատ երկրներում արդեն կան օրենքներ, որոնք արգելում են նման մոտեցումները։ Այդ գործերը դատարաններում անվանում են SLAPP (ռազմավարական) գործեր։ Այսինքն՝ եթե կան հետապնդման տարրեր ,ապա առհասարակ վարույթ չեն ընդունվում։ Հայաստանում ևս կարիք կա նման փոփոխությունների»,-Panorama.am-ի հետ զրույցում ասաց իրավաբան-էկոլոգ Նազելի Վարդանյանը։

Մինչդեռ Հայասատանում հակառակ պատկերն է։ Հանքարդյունաբերող ընկերություննրը բնապահպաններին լռեցնելու համար հայցեր են ներկայացնում դատարաններ և որպես կանոն գործը շահում են։ Ինչպես օրինակ դա եղավ լրագրող, բնապահպան Թեհմինե Ենոքյանի դեպքում, երբ «Լիդիան Արմենիա» ՓԲԸ-ն  շահեց դատը և նա ստիպված եղավ վճարել  ավելի քան 1 մլն 200 հազար դրամ։ Հիմա էլ «Զանգեզուրի պղնձամոլիբդենային կոմբինատ»-ն է հայց է ներկայացրել դատարան ընդդեմ «Համայնքային համախմբման և աջակցության կենտրոն» ՀԿ-ի նախագահ Օլեգ Դուլգարյանի ՝ պահանջելով հերքում և բռնագանձում 6 մլն դրամ։

Նազելի Վարդանյանի խոսքով՝  բնապահպանների նկատմամբ դատարանների միջոցով  ճնշման դեպքերը վերջին երեք տարիների ընթացքում ավելացել են։

«Սա վտանգավոր տենդենս է, քանի որ կարող է մեծ մասշտաբների հասնել։ Թեև ոչ մի արդյունքի չեն հասնում, քանի որ բնապահպաններին այդ միջոցով չեն կարող լռեցնել, բայց , բոլոր դեպքերում անհարմարություններ են ստեղծվում՝ դրամական վճարումների բեռ բնապահպանների վրա, նյարդային վիճակ և այլն։ Սա նախևառաջ պատիվ չի բերում բիզնեսի ներկայացուցիչներին, թեև դիմում են դատարան իբրև հեղինակությունը վերականգնելու համար, սակայն ճիշտ հակառակն է ստացվում։  Հանրությունը շատ բացասական է գնահատում, բայցի դրանից մեր գործերը գրանցվում են միջազգային ռեեստրներում՝ որպես անթույլատրելի գործեր։ Բացի այդ, այս բոլոր գործերը գնում են Եվրադատարան և հետո մեր բյուջեից պետք է վնասի հատուցումներ տրվեն։ Ինչի՞ համար, զուտ նրա համար, որ ինչ-որ մի բիզնես ինչ-ինչ հարցեր է ուզում լուծել»,- ասաց իրավաբան-էկոլոգը։

Նա նշեց, որ Հայաստանում դատարաններում քննվող գործերի ընթացքը թույլ է տալիս եզրակացնելու, որ ամեն դեպքում այլ տարբերակ քաղաքացիները չունեն,բացի Եվրոպական դատարան դիմելուց։

«Այն գործընթացները, որոնք տեղի են ունենում դատական համակարգում, խոսում է այն բանի մասին, որ Եվրադատարանի վճռիներով պարտավորվելու են փոխհատուցման վճարներ անելու։ Սա իհարկե, ցանկալի չէ,  սակայն այլ ճանապարհ չկա։ Մեր դատական համակարգը չի աշխատում, ինչի հետևանքով  բիզնես ոլորտը «թևավորվել» է։  Կառավարությունն էլ չի կանխում, թեև արդեն երկու ընկերություններում ( ԶՊՄԿ և «Լիդիան Արմենիա») բաժնեմաս ունի։ Հենց այս երկու ընկերություններն էլ ակտիվ դիմում են դատարաններ։ Կառավարությունը հավասար պատասխանատվություն է կրում այն ամենի համար, ինչը տեղի է ունենում»,- հավելեց Վարդանյանը

Իրավաբանը կարծում է, որ նման դեպքերն էապես վնասում են մեր երկրի հեղինակությանը։

Ավելի մանրամասն՝ հղմամբ։