Ձեր վստահելի աղբյուրը

«ՀԱՊԿ-ի հետ կապված մեր դիրքորոշումը երկար ժամանակ հայտնում ենք։ Մենք ակնկալում ենք, որ ՀԱՊԿ-ը ճանաչի իր պատասխանատվության սահմանը, այն է՝ Հայաստանի ճանաչված 29 800 քկմ տարածքը, ինչպես նաև սահմանները, որոնք գոյություն ունեն Վրաստանի, Թուրքիայի, Իրանի ու Ադրբեջանի հետ»,- ԱԺ-ում լրագրողների հետ զրույցում ասաց Անվտանգության խորհրդի քարտուղար Արմեն Գրիգորյանը:

Նա նշեց, քանի դեռ ՀԱՊԿ-ը  չի ճանաչել, այս խնդիրը  մնում է օդում։

Դիտարկմանը, որ  Հայաստանի և Ադրբեջանի միջև սահմանը հիմա էլ հստակ չէ, Ադրբեջանն օկուպացրել է ՀՀ ինքնիշխան տարածքից հատված, Արմեն Գրիգորյանն արձագանքեց. «Մենք ինչպե՞ս ենք իմանում, որ Ադրբեջանն օկուպացրել է ձեր նշած տարածքը, որովհետև սահման գոյություն ունի: Ալմաթիի հռչակագրով Հայաստանի և Ադրբեջանի միջև ադմինիստրատիվ սահմանը, որը գոյություն է ունեցել ԽՍՀՄ շրջանում, անկախություն հռչակելուց հետո դարձել է միջպետական սահման: Այդ սահմանը գոյություն ունի, մենք պետք է գնանք, վերարտադրենք այդ սահմանը: Հայաստանը ՀԱՊԿ անդամ է և ՀԱՊԿ-ը միանշանակ պետք է հասցեագրի այս հարցը»:

Ըստ նրա, ՌԴ-ն որպես ՀԱՊԿ անդամ, պետք է հստակեցնի իր դիրքորոշումը. «Կասեի՝ ավելի շատ անհրաժեշտություն կա, որ ՌԴ-ն, որպես ՀԱՊԿ անդամ, հստակեցնի իր դիրքրոշումները Հայաստանի հանդեպ, այլ ոչ թե Հայաստանը»։

Հարցին՝ արդյո՞ք Հայաստանը քննարկում է առաջիկայում Եվրամիության անդամակցության թեկնածու դառնալու հարցը, ԱԽ քարտուղարն ասաց. «Հայաստանը քննարկում է  տարբեր հարցեր, օրակարգում տարբեր հարցեր կան,  մենք շարունակելու ենք գոյություն ունեցող  բոլոր ուղղություններն ու հարցերը քննարկել։

Բոլոր հարցերը մեր սեղանին են ու քննարկում ենք»։

Ինչ վերաբերում է ՀՀ արտաքին քաղաքականությանը, նա ասաց. «Այս պահին Հայաստանն իրականացնում է  դիֆերսիֆիկացիայի քաղաքականություն։

Ռազմական տեխնիկայի ձեռքբերումը Ռուսաստանի հետ, օրինակ, 96 տոկոսից իջել է 10 տոկոսից էլ ցածր մակարդակի։ Սա նշանակում է, որ Հայաստանը իրականացնում է դիվերսիֆիկացիայի քաղաքականություն և գործընկերներ է ձեռքբերում ոչ միայն Արևմուտքում, այլ նաև Ասիայում, Հնդկաստանում և այլ տեղերում։

Եվ տնտեսական, և անվտանգային առումով դիվերսիֆիկացնում ենք մեր քաղաքականությունը։ Միայն հունվարին արտաքին առևտրաշրջանառությունը  Էմիրաթների հետ հասել է 16 տոկոսի, անցած հունվարի եղել է 4 տոկոս։

Սա նշանակում է, որ մեծ փոփոխություններ են տեղի ունեցել՝ Հայաստանն իրականացնում է տնտեսության, քաղաքականության, անվտանգության  ոլորտում դիվերսիֆիկացիայի քաղաքականություն։

Հայաստանը ոչ մի տեղ չի գնում։ Հայաստանը նաև տարածաշրջանացման քաղաքականություն է վարում։ Հայաստանը լավ հարաբերություններ ունի Արևմուտքի հետ, փորձում է լավ հարաբերություններ կառուցել բոլոր հարևանների հետ, հարաբերություններ կառուցել Թուրքիայի, Ադրբեջանի հետ։ Սա է մեր օրակարգը»։

Նա նաև նշեց. «Մենք առնվազն մինչև 2021 թվականի դեկտեմբեր մեր անվտանգության բոլոր երաշխիքները փոխկապակցել ենք ՌԴ հետ, նույնիսկ կարելի է ասել 96-100 տոկոս և ունեցել ենք Ադրբեջանի առնվազն երեք լայնածավալ հարձակում և ՀՀ տարածքի օկուպացիա, բազմաթիվ այլ խնդիրներ։

Հիմա այս խնդիրների պայմաններում Հայաստա՞նն է մեղավոր, որ Հայաստանի վրա հարձակվել են։ Միանշանակ ոչ։ Հայաստանին պարզապես իր դաշնակիցները չեն օգնել, երբ որ անվտանգության սպառնալիքի առաջ է կանգնել։ Հայաստանը, հաշվի առնելով սա՝ սկսել է դիվերսիֆիկացնել և անվտանգության նոր երաշխիքներ փնտրել»։ 

Հարցին՝  տալի՞ս են այդ երաշխքիները, նա պատասխանեց. «Ոչ մեկ ոչ մեկին  երաշխիքներ չի տալիս։ Երաշխիքը չպատկերացնենք, որ ինչ-որ մի երկիր գալիս ու ասում է՝ դու այլևս անվտանգ ես։ Նման բան չի լինելու, նման բան չկա աշխարհում։

Մեր ակնկալիքն է ունենալ դիվերսիֆիկացված տնտեսության, անվտանգություն»։

Ա. Գրիգորյանը նաև նշեց, որ ՌԴ-ն միայն Հայաստանին չի վատ վերաբերվում. «Եթե մեկ հոգի շատերի կամ բոլորի հետ վատ է, ոչ թե շատերի մեջ պետք է այդ մեղավորությունը փնտրել, այլ մեկ հոգու մեջ»։ 

Հարցին, այդ դեպքում ինչո՞ւ են մեղադրում Հայաստանում, նա պատասխանեց. «Ենթադրում եմ, որ մեր ժողովուրդը որոշել է իր ազատ, արդար ընտրություններով իշխանություն ձևավորել»։