Ձեր վստահելի աղբյուրը

«Աբովյան» քերակատարողական հիմնարկում կալանավորների և դատապարտյալների թիվը կազմում է 74 անձ, նրանցից 5-ն արական սեռի ներկայացուցիչներ են՝ 3-ը չափահասներ են, 2-ն անչափահաս։ «Մեդիա կենտրոնում» «Անազատության մեջ գտնվող կանանց վերարտադրողական առողջությունը.  խնդիրներ, մտահոգություններ» թեմայով քննարկմանն ասաց «Աբովյան քրեակատարողական հիմնարկի բժիշկ-գինեկոլոգ Անահիտ Գրիգորյանը։

Նա նշեց, որ քանի որ ՔԿՀ-ում մեծ մասը կանայք են, նրանց առողջական վիճակը գտնվում է ուշադրության կենտրոնում, յուրաքանչյուր բարձրացված խնդրի անմիջապես արձագանքում են։

«Մուտք գործելով կալանավայր՝ կանայք ենթարկվում են մանրակրկիտ մարմնական զննման, սկրինինգային հետազոտության։  Մեր կոնտինգենը հաշվառված է նաև «Աբովյան» բժշկական կենտրոնում, ծննդատանը, ավելի մանրամասն հետազոտությունները անհրաժեշտության դեպքում կատարվում են այնտեղ»,- ասաց Ա. Գրիգորյանը։

«Իրավական նախաձեռնությունների կենտրոն» ՀԿ նախագահ Նարե Հովհաննիսյանն ասաց, որ վերջին տարիներին «Աբովյան» ՔԿՀ-ում վերականգնման աշխատանքներ արվել են,  բայց դեռևս բարելավման կարիք կա։

«Կանայք  որոշակի դժգոհություն ունեն հիմնարկի խոնավությունից։ Դա կարող է ազդեցություն թողնել առողջության վրա։

Որոշ դժգոհություններ  կան կանոնավոր տաք ջրի հասանելիության հետ կապված։ Այս հարցի կարգավորումը խիստ անհրաժեշտություն է։ Իհարկե, հիմա շաբաթական երկու անգամ է թույլատրվում լոգանք ընդունել, նախկին մեկ անգամվա փոխարեն։

Կանանցից մեկը, ով ազատազրկման ընթացքում կեսարյան հատմամբ է երեխա ունեցել, նշել է, որ լվացքը ձեռքով անելու հետևանքով որոշակի բարդություններ էր առաջացել իր մոտ՝ բորբոքումներ, տարատեսակ խնդիրներ։

Կանանցից մեկն ասել է, որ հղիության ընթացքում դժվարությամբ է օգտվել սանհանգույցից, քանի որ հարմար չէր»,- ասաց նա։