Ձեր վստահելի աղբյուրը

Ռուսական կողմը տեղեկացվել է «Զվարթնոց» օդանավակայանից ռուսական սահմանապահների դուրսբերման հայկական նախաձեռնության մասին: Երևանում Կիպրոսի ԱԳ նախարարի հետ համատեղ ասուլիսում հայտարարեց ՀՀ արտաքին գործերի նախարար Արարատ Միրզոյանը:

«Ի սկզբանե, ռուսական սահմանապահների մասնակցությունը մի շարք կետերում, այդ թվում «Զվարթնոց» օդանավակայանում, մտածված է եղել, իբրև աջակցություն նորանկախ հայկական պետությանը, նախատեսված է այս գործառույթն իրականացնել այնքան ժամանակ, քանի դեռ Հայաստանը դրա կարիքը ունենա, և երբ Հայաստանը կունենա իր ինստիտուցիոնալ հնարավորությունները, այդ գործառույթն ամբողջությամբ կիրականացնի Հայաստանը իր պատկան մարմինների իջոցով:

Եվ ահա հիմա մենք կարծում ենք, որ Հայաստանն ինստիտուցիոնալ առումով ի զորու է «Զվարթնոց» օդանավակայանում միայնակ իրականացնել սահմանապահ ծառայությունը, և ծանուցել ենք ռուսական կողմին այս մասին:

Ենթադրում եմ, որ սա բավարար կլինի ռուսական կողմի համար և հարցը այդքանով կլուծվի»,- ասաց Ա. Միրզոյանը։

Ըստ նրա,  խոսքը լիազորությունների ամբողջ փաթեթի մասին է:

«Հայկական կողմը ծանուցել է ռուսական կողմին, որ «Զվարթնոց» օդանավակայանում իրականացվող սահմանապահ ծառայության մեջ այլևս ռուսական կողմի աջակցության կարիքը չենք զգում:

Իհարկե, շնորհակալություն ենք հայտնում ռուսական կողմին»,- ասաց Ա.Միրզոյանը։

Նա նաև նշեց, որ հայտարարությունը միայն «Զվարթնոց» օդանավակայանի մասին է։