Ձեր վստահելի աղբյուրը

«Երևանի քաղաքապետարանում քննարկվել է տրանսպորտի թանկացման չարաբաստիկ օրինագծի, որն ամբողջությամբ անհիմն էր»,-ֆեյսբուքյան ուղիղի եթերում հայտարարեց Երևանի ավագանու «Մայր Հայաստան» խմբակցության անդամ Մեսրոպ Մանուկյանը:

«Պնդումները, որ քաղաքապետարանը 7 միլիարդ դրամ սուբսիդավորում է, հերքվեց բյուջեի կատարողականի ծախսային հատվածի քննարկման ժամանակ: Պարզվեց 4 միլիարդ 34 միլիոն դրամ է ընդամենը քաղաքային բյուջեից սուբսիդավորվում:

Այդպես էլ հրաժարվեցին ներկայացնել, թե օրական որքան գումար է հավաքագրում «Երևան ավտոբուս» ՓԲԸ-ն, որպեսզի պարզ լինի, թե ինչպես է ձևավորվում բյուջեն. սկզբից հավաքագրվում են  մեր վճարած 100 դրամները, պակասորդ գումարը սուբսիդավորվում է քաղաքային բյուջեի կողմից։

Իրենց թանկացումը շուրջ 200 դրամ և ավելի է, ստացվում է, որ 21 մլրդ դրամ լրացուցիչ մուտք են իրենք ապահովում:

Ծիծաղելի էր, որ փոխքաղաքապետ Սուրեն Գրիգորյանը նիստի ժամանակ պնդեց, որ օրական 550 հազար ուղևորափոխադրում է լինում, այնինչ 2014-ին WIG-ի հետազոտություններով 630 հազար ուղևորափորադրում էր լինում օրական և կեսից ավելին են կարողանում հավաքագրել: Նրանք պնդում են, որ տարվա կտրվածքով նվազագույնը 10 միլիարդ դրամի ստվեր կա, այսինքն նրանք չեն կարողանում 10 միլիարդի ստվերը կառավարել, այս տրամաբանությամբ իրենք փրոձում են քաղաքը կառավարել, արդյունավետությունը գնահատել»,-ասաց նա:

Մ.Մանուկյանը  կոչ արեց հասարակությանը ոտքի կանգնել, քանի որ միայն հանրային ճնշման արդյունքում քաղաքային իշխանությունները տեղի կտան. «Պետք է հանրային ճնշում լինի: Նրանց պնդումը, որ չենք կարողանում, ծախսերը շատ է, ամբողջությամբ անհիմն են:

Ամենամեծ կոռուպցիան այն է, որ թաքցնում են, թե որքան գումար է օրական հավաքագրվում ուղևորավճարներից: Հաջորդ մեծ կոռուպցիան այն է, որ իմ հաշվարկով ու իրենց պնդումով,  10 միլիարդ դրամի ստվեր կա»:

«Մայր Հայաստան» խմբակցության անդամ Գևորգ Ստեփանյանն ասաց. «Մարտի 12-ի ավագանու նիստի ժամանակ կբերեն նախագիծն և ցանկություն ունեն անցկացնելու այս խայտառակ նախագիծը: Մնում է միայն, որ ժողովուրդն ընդվզի, սրա դեմն առնելու միակ միջոցը հանրային ընդվզումն է»։

Հիշեցնենք, որ միասնական տոմսային համակարգի լրամշակված նախագիծով, որը կքննարկվի ավագանու առաջիկա նիստում, նախատեսվում է ՝

30 օրվա համար 8800 դրամ՝ անսահմանափակ երթևեկելու հնարավորությամբ։
90 օրվա համար 23600 դրամ՝ անսահմանափակ երթևեկելու հնարավորությամբ։
365 օրվա համար 88000 դրամ՝ անսահմանափակ երթևեկելու հնարավորությամբ։

Ցանկացած փաթեթ ձեռք բերելու դեպքում քաղաքացիները կարող են օգտվել հասարակական տրանսպորտի բոլոր միջոցներից։

Ուսանողների, բնակչության սոցիալական կամ հատուկ խմբերի համար կկիրառվեն զեղչեր: