Ձեր վստահելի աղբյուրը

Մարտի 8-ին՝ Կանանց տոնի առթիվ «երջանկությունից» և «գեղեցկությունից» զատ ավելի հաճախ է հնչում «առողջության» բարեմաղթանքը։ Գեղեցիկ գարնանային տոնի խորհրդի ներքո Panorama.am-ը զրուցեց Էրեբունի ԲԿ-ի բժիշկ, գինեկոլոգ Տիգրան Հովհաննիսյանի հետ։

«Նախ կցանկանայի շնորհավորել մեր մայրերին, կանանց և աղջիկներին Մարտի 8-ի՝ կանանց տոնի առիթով, նրանց մաղթել երջանկություն և առողջություն։ Գեղեցիկ սեռը աստվածատուր առաքելություն ունի երեխաներ ունենալու և մարդկության հարատևությունը ապահովելու համար։

Երկրագնդի էկոլոգիական վատթարացող վիճակը, շրջակա միջավայրի աղտոտվածությունը բնականաբար, բացասաբար է ազդում նաև կանանց առողջության վրա, այդ թվում նաև՝ վերարտադրողական առողջության։

Հիվանդացությունների թիվը տարեցտարի շատանում է և խորհուրդ կտայի, որ կանայք իրենց շատ հետևեն։ Թող առողջ լինեն, միշտ մայրանան և գեղեցիկ լինեն։ Մարմնով, ֆիզիկապես առողջ լինելը միշտ արտահայտվում է արտաքինի վրա։ Կինը երբ ֆիզիկապես առողջ է, ապա արտաքինով էլ է գեղեցիկ։

Այսօր անպտղությունը զգալի տոկոս է կազմում մեր կանանց շրջանում և դրանց պատճառները հիմնականում ինֆեկցիոն և հորմոնալ բնույթի խնդիրներ են։

Անպտղությունը կանխարգելելու համար մեր կանայք և աղջիկները պետք է առաջին հերթին ուշադրություն դարձնեն սննդին, սննդակարգին և անպայման վարեն առողջ ու ակտիվ ապրելակերպ։ Մայրերը պետք է փոքր տարիքից հետևեն իրենց աղջիկներին, հիգիենայից սկսած՝ ապրելակերպով, սննդով և մյուս անհրաժեշտ գործոններով ավարտած։

Կանանց առողջության պահպանման և երջանիկ տեսնելու հարցում բոլորս էլ անելիք ունենք։ Կրկին շնորհավորում եմ նրանց գարնանային այս գեղեցիկ տոնի առթիվ՝ առաջին հերթին մաղթելով առողջություն, ինչը գեղեցկության գրավականն է»,-ասաց Տիգրան Հովհաննիսյանը։