Որպես ժամանակին հետդ մի կտոր հաց կիսած մարդ, բարեկամաբար հորդորում եմ՝ հեռացի՛ր, քանի հնարավոր է․ Սուրենյանցը՝ Փաշինյանին
«Դեմոկրատական այլընտրանք» կուսակցության նախագահ Սուրեն Սուրենյանցը կուսակցության նախաձեռնած հավաքի ընթացքում իր ելույթում անդրադարձավ նաև 44-օրյա պատերազմից հետո ստորագրված փաստաթղթին, նաև՝ այն թեզին, թե պատերազմը թուրք-ռուսական դավադրության հետևանք էր։
«Ասում են՝ պատերազմը ռուս-թուրքական համաձայնություն էր․ անգրագետ մի թեզ։ Իրականում մի դավադրություն է հյուսվել, որի հեղինակը Նիկոլ Փաշինյանն է։ Նա այնպիսի քաղաքականություն է վարել, որ Ադրբեջանի ագրեսիվ օրակարգի շուրջ ձևավորվել է միջազգային կոնսենսուս։ Ի դեպ, հիմա էլ ենք շատ մոտ դրան, ցավոք սրտի»,- ասաց նա։
Ինչ վերաբերում է պատերազմից հետո ստորագրված Նոյեմբերի 9-ի փաստաթղթին, ապա քաղաքական գործիչն ասաց․ « Նոյեմբերի 9-ի փաստաթուղթը լավ փաստաթուղթ չէր, բայց լավ փաստաթուղթ ՀՀ-ի համար չէր կարող լիներ , որովհետև պարտված երկիրը լավ փաստաթուղթ չի ունենում, նաև այն երկիրը, որը մի քանի անգամ պատերազմի ընթացքում մերժում է խաղաղության հաստատման առաջարկներ։ Ի դեպ, եթե դահլիճում կան այդ կուսակցության ղեկավարներ ևս, ապա կհաստատեն իմ խոսքը՝ հոկտեմբերի 18-ին Նիկոլ Փաշինյանը հանդիպել է կուսակցությունների ղեկավարների հետ և ասել՝ Պուտինն առաջարկում է հրադադար, Շուշին հանձնելու մասին խոսք չի եղել, նա ստում է։ Ավելին՝ այդ հանդիպման ժամանակ նա ասել է, որ ինքն է դիմել Պուտինին, որպեսզի Սյունիքում տեղակայվեն 102-րդ ռազմաբազայի օժանդակ ուժեր՝ ռուսական դրոշներով, որովհետև իրական վտանգ կա, որ թիրախավորվելու է Մեղրին։ Հիմա այս նույն պատմությունը , որը նա պատմել է 20 հոգու ներկայությամբ, պատմում է լրիվ այլ կերպ՝ ներկայացնելով այլ իրականություն»։
Սուրենյանցի խոսքով՝ Նոյեմբերի 9-ի փաստաթուղթն, այսօրվա զարհուրելի իրականության համեմատ, փրկության փաստաթուղթ էր։
«Փաստաթղթի հիմքում դրված էր Հայաստանի և Ադրբեջանի իշխանությունների սահմանափակման փոխադարձ սկզբունքը, որը երաշխավորելու էր ԼՂ հայկականության ապահովումը գոնե։ 100 տոկոսով եմ ասում, քանի որ շատ խորն այդ փաստաթուղթն ուսումնասիրել եմ»։
Իր ելույթի ավարտին Սուրենյանցը Նիկոլ Փաշինյանի համար երկու հորդոր ուներ։
«Ես նրան 1992թ․-ից ճանաչում եմ։ Նրա հետ երկար ճանապարհ ենք անցել՝ դառը օրեր,քաղցր օրեր և այլն։ 2012թ․-ից իմ և նրա հարաբերությունները խզվել են անշրջելի։ Բարեկամաբար խորհուրդ եմ տալիս Նիկոլ Փաշինյանին, քանի դեռ քաղաքական կոնսենսուս կա ՝իր հեռանալու համար հումանիտար միջանց տրամադրելու, օգտվել այդ պատեհությունից։ Հավաստիացնում եմ՝ այս պահին հնարավոր է դա ։ Նիկոլ Փաշինյանի պաշտոնավարման ամեն օրը նրա և ընտանիքի անվտանգության հաշվին է,գուցե նա իրականությունը չի գիտակցում, բայց ես շատ լավ գիտակցելով, որպես ժամանակին հետը մի կտոր հաց կիսած մարդ իրեն բարեկամաբար հորդորում եմ՝ հեռացիր, քանի դա հնարավոր է։ Վաղը ճակատագրական ուշ է լինելու։ Երկրորդ հորդորը՝ այդ շարժման նկատմամբ չփորձել ճնշման որևէ մեթոդ բանեցնել։ Ցանկացած հարված ստանալու է համարժեք պատասխան։ Ամենայն պատասխանատվությամբ հայտարարում եմ, որ Նիկոլ Փաշինյանը հեռանալու է և ես գնալու եմ նրա հետևից առաջիններից մեկը»,- եզրափակեց Սուրենյանցը։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
