Ձեր վստահելի աղբյուրը

«Կոնսերվատորիան վերցնել ու այստեղից տեղափոխել այլ հասցե, հեռացնել այս տարածքից, նշանակում է կտրել հայոց պետության երաժշական մշակույթի զարկերակը»,- Panorama.am-ի հետ զրույցում ասաց Երևանի Կոմիտասի անվան պետական Կոնսերվատորիայի դասախոս, կրթության փորձագետ Լիլիթ Մարտիրոսյանը։

Նա նշեց, որ  այսօր Կոնսերվատորիան տարածել է իր կարծիքը, պաշտոնական դիրքորոշումն արվեստի ԲՈւՀ-երի միավորման հարցի շուրջ, դրանից ավելի ոչինչ չի կարող ասել, որովհետև ավելին ոչինչ չգիտի։ Միաժամանակ ընդգծեց, որ Կոնսերվատորիայի միավորման վերաբերյալ որևէ որոշում չի տեսել, չի կարծում, որ նման որոշումներն այն աստիճանի թաքուն լինեն, որ նույնիսկ ռեկտորը դրա մասին չիմանա։

«Բայց ես իմ բացասական դիրքորոշումն եմ հայտնել, որը չի տարբերվում բուհի դիրքորոշումից։ Մենք, իհարկե, դեմ ենք, որ նման բան արվի։ Խոսել ենք այդ մասին, որ չի կարելի Կոնսերվատորիան տեղափոխվել։

Կոնսերվատորիան Օպերայի և բալետի ազգային ակադեմիական թատրոնի, Արամ Խաչատրյան համերգասրահի, Կամերային Երաժշտության տան, Հայկական երաժշտական ընկերության, Սայաթ-Նովայի անվան երաժշտական,  մասնագիտական՝ Չայկովսկու անվան երաժշտական դպրոցների հետ նույն տարածքում է տեղակայված։ Մեր բոլոր մասնագետները զուգահեռաբար հավասարապես, միաժամանակ աշխատում են այդ հաստատություններում։ Կրկնեմ՝ Կոնսերվատորիան վերցնել ու այստեղից տեղափոխել այլ տեղ, նշանակում է՝ երաժշտական կյանքի զարկերակ կտրել։

Դա մենք հասկանում ենք, բարձրաձայնել ենք այդ մասին»,- ասաց Լ. Մարտիրոսյանը։

Նա նաև նշեց, որ Կոնսերվատորիայի կազմակերպաիրավական ձևը չի ենթադրում նման միավորում։

Ինչ վերաբերում է ակադեմիական քաղաք ծրագրին և պատասխանելով հարցին, թե արդյո՞ք այն իրականության կդառնա,  կրթության փորձագետն ասաց. «Ենթադրություններ չեմ կարող անել, որովհետև մեր իրողությունն այնքան հարափոփոխ է, ոչ մի բանի վրա վստահություն չունեմ։
Իրատեսական չեմ գտնում Հայաստանի համար, չեմ գտնում, որ դա ճիշտ է, մենք այս պահին շատ ավելի կարևոր խնդիրներ ունենք։ Ճիշտ կլիներ, որպեսզի ֆինանսներն ուղղվեին դեպի այդ կողմը, ոչ թե դրվեին նման ձևական կողմ ապահովող, ոչ մի բանի ծառայելու ունակ ծրագրի վրա։
Չեմ գտնում, որ ձև փոխելով, բովանդակությունները պետք է փոխվեն, եթե բուհը չի աշխատում, չի աշխատելու որտեղ էլ որ լինի։

Չեմ կարծում, որ կարելի է այսպես առանց երկար-բարակ մտածելու որոշումներ կայացնել»։