Ձեր վստահելի աղբյուրը

«Հայաստանը ստանձնել է ԵԱՏՄ նախագահությունը։ Այս տարի Հայստանում ԵԱՏՄ անդամ երկրների ղեկավարների նիստ տեղի ունենալո՞ւ է, թե ոչ՞»,- ԱԺ Տարածաշրջանային և եվրասիական ինտեգրման հարցերի հանձնաժողովի նիստում հարցրեց «Հայաստան» խմբակցության պատգամավոր Ագնեսա Խամոյանը՝ դիմելով հանձնաժողովի փոխնախագահ, ՔՊ-ական պատգամավոր Վաղարշակ Հակոբյանին։

Նա պատասխանեց. «Հայաստանի սուվերեն տարածքի վրա տեղի է ունեցել ռազմական գործողություն, ու մենք ՀԱՊԿ-ից չենք ստացել համապատասխան գնահատական և գործողություն, որն ակնկալել ենք, որպես երկիր, ռազմաքաղաքական դաշինքի անդամ:

Մենք նշել ենք, որ հարցեր ունենք, դրանց մասին խոսել ենք աշխատանքային քննարկումներում: Այդ արձանագրությունների արդյունքում մենք հանգել ենք այն գնահատականին, որը հնչեցրել է Հայաստանի վարչապետը: Այդ գնահատականը հնչեցնելուց հետո Հայաստանը ստանձնել է ԵԱՏՄ նախագահությունը: Դա ռոտացիոն համակարգ է և որոշակի գործողություններ կան, որոնք մենք պետք է իրականացնենք:

Ես կարծում եմ, որ ԵԱՏՄ բլոկում մենք բավականին արդյունավետ գործունեություն ենք ծավալում որպես տնտեսություն: ԵԱՏՄ-ն բավականին լուրջ հնարավորություններ է մեզ համար ընձեռել և ընձեռում առնվազն վերջին տարիներին մեր տնտեսական քաղաքականության արդյունքում:

Հայաստանը ԵԱՏՄ կանոնադրությամբ և ԵԱՏՄ օրենքներով սահմանված կարգով առաջնորդվելու է և կատարելու է իր պարտավորությունները։ Այդ պարտավորությունների շրջանակում ինչ-որ ենթադրվում է, մենք կատարելու ենք։ Ձեր հարցի պատասխանը սա է, նաև քաղաքական պատասխան է։ Մենք շարունակելու ենք մեր գործունեությունը»։

Ագնեսա Խամոյանն արձագանքեց, որ ինքն իր հարցի պատասխանը չստացավ՝ Հայաստանում այս տարի ԵԱՏՄ երկրների ղեկավարների նիստ լինելո՞ւ է, թե՞ չի լինելու. «Վլադիմիր Պուտինը Հայաստան գալո՞ւ է, թե՞ չի համարձակվելու գալ, որովհետև Հայաստանը վավերացրել է Հռոմի ստատուտը։ Այդ հարցը քննարկվե՞լ է ձեր ռուս գործընկերների հետ, թե՞ ոչ, որովհետև  Պեսկովն այդ հարցը թողնում է օդում կախված»:

ՔՊ-ական Վաղարշակ Հակոբյանն ասաց. «Այդ հարցին բազմաթիվ անգամ մեր պաշտոնական աղբյուրները անդրադարձել են: Կրկնում եմ՝ Հայաստանը ԵԱՏՄ նախագահությունը ստանձնել է և դրա հետ կապված կանոնադրությամբ, օրենքով սահմանված բոլոր նորմերը մենք պահելու ենք։

Ես ձեզ հավաստիացնում եմ՝ ԵԱՏՄ նախագահության շրջանակներում Հայաստանը կատարելու է իր բոլոր պարտավորությունները: Թե այդ պարտավորությունների շրջանակում կլինի այց Հայաստան, թե չի լինի, կլինի գործողություն որևէ այլ երկրում, դա այլ հարց է:

Երբ լինի կոնսենսուս, որ բոլորը պետք է այցելեն Հայաստան կամ այլ երկիր, այդ գործողությունը տեղի կունենա: Բոլոր կնճռոտ հարցերը բոլոր գործընկերների հետ, նաև դաշնակից գործընկերների հետ քննարկումների փուլում են»:

Ա. Խամոյանը կրկին հարցրեց՝ Հայաստանում նիստ լինելո՞ւ է ի վերջո, թե՞ չի լինելու

«Հայաստանը շարունակելու է իրականացնել ԵԱՏՄ-ում նախագահությունը՝ դրանից բխող բոլոր գործողությունների շղթայով։ Չնայած բոլոր այն հարցերին,  որոնք մենք ունենք, մենք կատարում ենք ԵԱՏՄ-ում մեր նախագահությունը։ Սա ամենակարևոր արձանագրումն է»,- ասաց Վ.Հակոբյանը։