Ձեր վստահելի աղբյուրը

Երևանի ավագանու այսօրվա նիստի օրակարգում ընդգրկված է 28 հարց, որից միայն 6-ն է զեկուցվող։ Երևանի քաղաքապետ Տիգրան Ավինյանը հայտարարեց, որ գլխադասային՝ քաղաքաշինության և հողօգտագործման  հարցերի մշտական հանձնաժողովի կողմից չզեկուցվող հարցերից 6-ի վերաբերյալ տրվել է բացասական եզրակացություն, որոնք հանվում են օրակարգից՝ հետագայում ավելի մանրամասն քննարկելու համար։

Առաջարկվեց «Ջրային կառույցների» փակ բաժնետիրական ընկերությունը լուծարելու մասին հարցը չզեկուցողից դարձնել զեկուցող, որն ընդունվեց։

«Ազգային առաջընթաց» խմբակցության անդամ Արամ Թորոսյանն առաջարկվեց «Երևան համայնքում 100 տոկոս համայնքային մասնակցությամբ օպերատորի կողմից ներհամայնքային ավտոբուսային կանոնավոր փոխադրումների սպասարկման դեպքում երթուղիների սպասարկման փոխադրավարձը սահմանելու մասին» նախագիծը հանվի օրակարգից. «Վստահաբար այն ամբողջովին մշակված չէ։ Նաև առաջարկում եմ բոլոր հարցերը դարձնել զեկուցվող»։ 

Նա նաև ասաց, որ տրանսպորտի սակագանի հարցի շուրջ իրենք հրավիրել են փորձագետ՝ նախկին քաղաքապետ Հայկ Մարությանին, որի մուտքը արգելվում է. «Փորձագետ ասելով՝ նկատի ունեմ լավ տեղեկացված անձնավորություն է, որի մուտքն արգելվում է, ոստիկանները չեն հասկանում ինչ ասեն՝ թույլ տան, թույլ չտան։ Օրենսդրության համապատասխան հրավերը կայացվել է, իսկ ներքին հրամանը, որը գործում է, չի կարող վեր դասվել օրենքից»։

«Մայր Հայաստան» խմբակցության ղեկավար Մանուկ Սուքիասյանն առաջարկեց բոլոր չզեկուցվող հարցերը դարձնել զեկուցող, տրանսպորտի  սակագանի մասին փաթեթը հանել օրակարգից։

Այնուհետև Ավինյանը հայտարարեց, որ օրակարգը հաստատելու մասին հարցը դնում են քվեարկության։

«Խմբակցությունների առաջարկները մենք լսեցինք... Կներեք էլի, թողեք ես իմ լիազորությունների շրջանակում գործեմ։ Ժողովուրդ  ջան, այն, ինչ ձեզ դուր չի գալիս, դա մի բան է, ինչ ընթացակարգն է  ենթադրում, այլ բան է»,- ասաց Ավինյանը։

Այնուհետև նա հայտարարեց, որ օրակարգը հաստատված է։

«Կարո՞ղ  եմ հասկանալ, թե ինչո՞ւ երկրորդ անգամ քվեարկություն եղավ»,- հարցրեց Թորոսյանը։

«Պարոն Թորոսյան, ձեր բարձրաձայնած հարցը օրակարգը հաստատելու կամ չհաստատելու մասին չէ։ Ես  լսեցի ձեր առաջարկը։ Առաջարկվում է  այն տրամաբանությամբ, որը քաղաքապետն է առաջարկում։ Եթե ուզում եք դեմ քվեարկեք, ձեր իրավունքն է»,- ասաց Ավինյանը։

Թորոսյանը շարունակեց. «Նոր հարցը դրեցիք քվեարկության, չանցավ,  27 էր կողմ։ Նորից քվեարկեցիք»։

«Որովհետև ընթացքում բոլորդ խոսեցիք, քվեարկությունը կիսատ մնաց։ Մարդիկ չհասկացան ինչ տեղի ունեցավ, հետո մեծամասնությունը կողմ քվեարկեց։

Խնդրում եմ՝ միկրոֆոնը տեղին-անտեղին մի միացրեք։ Մանկապարտեզ ենք խաղալո՞ւ։ Ժողովուրդ ջան, ավարտվեց»,- արձագանքեց Ավինյանը։

«Զոռով չեն անցկացնում»,- ասաց Թորոսյանը։

«Զոռովի հարց չէ, պարոն Թորոսյան։ Իրոք մանկապարտեզ եք անում։ Ընդհատեցիք ինձ, ոչ մեկ չլսեց՝ ինչ եմ ասում։ Հետո 36 կողմով անցավ»։

«Ի՞նչ 36»,- զարմացած արձագանքեցին ընդդիմադիր խմբակցության անդամները։

«Լավ, 32, օքեյ»,- պատասխանեց Ավինյանը։

Սակայն տեղից շարունակում էին ավագանու անդամները հարցեր տալ՝ ասելով, թե խայտառակություն է այս ամենը։

«Լավ, ժողովուրդ ջան, սա բալագան չի։ Ավարտեք, իյա։ Դուրս եկեք, խնդրեմ»,- զայրացավ  Ավինյանը։

Դիմելով ընդդիմությանը՝ ասաց. «Որդեգրել եք ամենաանկառուցողական հնարավոր մոտեցումը։ Իսկ ո՞վ է ասել, որ ձեր հետ առահասարակ պետք է հաշվի նստենք։ Միտինգի չեք, ժողովուրդ ջան։ Սա Երևանի ավագանու նիստն է։

Իմ նեռվերը բետոնից է. ինձ հունից չեք կարողանալու հանել, մեզ հունից չեք կարողանալու հանել։ Վերջ։ Իմ ստիպեք ինձ միկրոֆոններն անջատել, զգուշացումներ սկսել անել»։