Ձեր վստահելի աղբյուրը

 «Ես չեմ հիշում մի դեպք, որ ստորագրահավաքը փոփոխություն մտցրած լինի, բայց ամեն դեպքում սա քայլ է, առաջին քայլն է, որը ինչ-որ գործողությունների հերթականության սկիզբ կարող է լինել:  Եթե ստորագրահավաքը չօգնի, միշտ կան ավելի կտրուկ գործողություններ»,- Կոմիտասի անվան պետական կոնսերվատորիան այլ վայր տեղափոխելու դեմ ուղղված ստորագրահավաքի մասին ասաց երգիչ, դերասան Հայկ Պետրոսյանը, ով ևս միացել է դրան:

Ըստ Հայկ Պետրոսյանի, «ակադեմիական քաղաքը» լավ գաղափար է. «Ես երբ սովորում էի Փարիզում, այնտեղ կա նման բան, բայց դրա ռազմավարությունը, քայլերի հերթականությունը, մշակումը,  տեխնիկական և տրամաբանական հարցերը... Շատ բացեր կան, շըփ-թըփ, հաճեպ անելու բաներ չեն:

Վերջին ժողովի ժամանակ երաժշտագետ Մհեր Նավոյանը հրաշալի արտահայտվեց այդ մասին։ Տպավորիչ էր միտքը, որ վերջին անգամ Հայաստանում համալսարան փակվել է 15-րդ դարում, և ահա 6-7 դար անց կանգնած ենք նույն կոտրված տաշտակի առջև: Պատճառները շատ խորքային են։  Երևի պետք է ազգովի հասկանանք մշակույթի իրական կարևորությունը, տեղն ու դերը մեր կյանքում, մեր պետության պահպանման հարցում»։