Ձեր վստահելի աղբյուրը

Զագրեբի Pasionska baština Zagreb 33-րդ փառատոնի մարտի 12-ին CELESTE վոկալ անսամբլը ներկայացրել է «Լռության երաժշտություն» խորագրով ծրագիրը։ Յ․ Ս․ Բախի, Ա․ Բրուքների, Ջ․ Տավեների խմբերգերի հետ միասին հնչել է նաև խորվաթական և հայ հոգևոր երաժշտություն։ Անսամբլի հիմնադիր, գեղարվեստական ղեկավարն է Զագրեբի համալսարանի Երաժշտական Ակադեմիայի Արվեստի, մշակույթի և միջհամալսարանական դեպարտամենտի գծով պրոռեկտոր Յաշենկա Օստոյիչը։

Երևանի Կոմիտասի անվան պետական կոնսերվատորիայից հայտնում են, որ փառատոնի մեկնարկը նույնպես նվիրված է եղել հայ երաժշտությանը, այդ օրվա դասախոսությունից ու հայ երաժիշտների մասնակցությամբ համերգից հետո Յաշենկա Օստոյիչը ցանկություն է հայտնել առաջին անգամ ներկայանալ հայ կոմպոզիտորի ստեղծագործությամբ։ Երևանի Կոմիտասի անվան պետական կոնսերվատորիան խմբավարին անմիջապես տրամադրել է Կոմիտասի «Տեր ողորմեա»-ն։ Այդ օրերին Զագրեբում է եղել  ԵՊԿ դասախոս Լիլիթ Մարտիրոսյանը, ում տեքստային ու երաժշտական կատարողական հարցերին վերաբերող հուշումներն ու առկա համագործակցությունը հնարավոր են դարձրել իրականցնել խորվաթ երաժիշտների մտահղացումը։