Ձեր վստահելի աղբյուրը

«Փաստորեն, ճիշտ հասկացա՞նք, որ արցախահայերի վերադարձի մասով ՀՀ-ն ոչ մի քայլ չի ձեռնարկում, որովհետև, եթե ասվում է՝ իրենց կողմից պետք է լինի որոշում, անհասկանալի է, իրենց կողմից որոշումն ինչպե՞ս պետք է ձևակերպվի։ Այստեղ ՀՀ-ն պետք է լինի հարցն առաջ տանողը»,-«ԱԺ արտաքին հարաբերությունների մշտական հանձնաժողովում ՀՀ կառավարության ծրագրի (2021-2026 թթ.) 2023 թվականի կատարողականի արդյունքները ներկայացնելու ժամանակ Արարատ Միրզոյանին հարցրեց «Հայաստան» խմբակցության պատգամավոր Լևոն Քոչարյանը։

Հայտնելով, որ նախկին արտգործնախարար Վարդան Օսկանյանի գլխավորությամբ կոմիտե է ձևավորվել, որը շատ լուրջ գործ է անում արցախահայերի իրավունքների ուղղությամբ՝ պատգամավորը հարցրեց, թե ՀՀ ԱԳ նախարարությունն արդյոք կաջակցի Օսկանյանին։

Ընդդիմադիր պատգամավորը նաև հարց բարձրացրեց, թե ինչու են Հայաստանը տարբեր ուժային կենտրոնների բախման կենտրոն դարձնում։ 

«Մեր հիմնական խնդիրն է տարբեր ուժային կենտրոնների բախման կետ դառնալուց խուսափելը»,-ասաց Քոչարյանը։

Նկատելով, որ աշխարհակարգի վերադասավորւմ է տեղի ունենում և այդ ֆոնին աջակցող հայտարարություններ են հնչում ԵՄ-ից և Մեծ Բրիտանիայից՝ Քոչարյանը նշեց, որ ՀՀ-ից հնչող հայտարարությունները մտահոգող են։

«ՀՀ-ից ամենբարձ մակարդակով կատարվող հայտարարությունները Ռուսաստանի,  ՀԱՊԿ-ի հետ կապված, թվում է, թե արվում է ճիշտ հակառակը՝ մեզ հենց այս բախման կետ դարձնելու, այս շահերն այստեղ հակադրելու նպատակով,  որը չափազանց վտանգավոր է մեր երկրի համար։ ԱԳՆ-ն չպետք է առաջնորդվի հանրային տրամադրություններով, նայի թե վերջին հարցումներն ինչ են ցույց տալիս, թե երկրի հանդեպ ինչքան վստահություն կա, այլ ՀՀ-ի շահերից ելնի և նրա քաղաքացիների շահերով առաջնորդվի»,-ասաց Քոչարյանը՝ հարցնելով, թե ինչքանով է այդ քաղաքականությունը տեղավորվում խաղաղության խաչմերուկի համատեքստում։

Արարատ Միրզոյանը հայտնեց, որ երբ իրենք պաշտպանում էին արցախցիների շահերը, ընդդիմությունը նրանց դավաճան էր համարում, իսկ երբ արցախահայությունը բռնագաղթեց՝ սկսել է խոսել նրանց վերադարձի մասին, ինչը «փարիսեցիություն» է։

ԱԳ նախարարը հայտարարեց, որ այն պահին երբ ՌԴ-ի հետ պետք է աշխատեր տարիներ շարունակ հստակեցված դաշնակցային հարաբերությունները՝ դրանք չեն գործել և հիմա Հայաստանը դիվերսիֆիկացնում է իր անվտանգային համակարգը։

Հայտարարելով, որ ընդդիմությունը դեմ չէ արևմտյան կենտրոնների հետ աշխատանքին, որ նախկինում էլ է եղել ԵՄ-ի և ՆԱՏՕ-ի հետ հարաբերություններ՝ Լևոն Քոչարյանը շեշտեց, որ այդ համագործոկցությունը չպետք է լինի մյուս գործընկերների հաշվին։

«Նեղացած կնոջ օրինակը չպետք է լինի, երբ ամուսինը դավաճանում է, ինքն էլ ի պատսախան դրան գնում դավաճանում է ամուսնուն, ոչինչ չի շահում, այլ դառնում է փչացած»,- պատկերավոր բացատրեց Քոչարյանը։

Արարտ Միրզոյանն էլ հավաստիացրեց, որ երևէ մեկի հաշվին այլ ուժային կենտրոնների հետ հարաբերությունները չեն կառուցվում, նույնիսկ՝ Ադրբեջանի և Թուրքիայի։