Ձեր վստահելի աղբյուրը

«Դե ֆակտո, տարվա մեջ 365 օր բախվում ենք խնդիրների, հասկանում, որ սպառողների պրոբլեմները լուծում չեն ստանում և միայն Սպառողների պաշտպանության օրն այդ խնդիրները սկսում ենք արձանագրել՝ ակնկալելով, որ պատասխանատուները ականջալուր կլիննե»,-Սպառողների իրավունքների պաշտպանության միջազգային օրը հրավիրված ասուլիսում ասաց  «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը

Նա տեղեկացրեց, որ այս տարի օրվա միջազգային կարգախոսն է. «Արդար, պատասխանատու արհեստական բանականություն սպառողների համար»։

Ըստ բանախոսի՝ աշխարհը դինամիկ առաջա է գնում սպառողների իրավունքների պաշտպանության և կանոնակարգման հարցում, իսկ Հայաստանում դոփում են տեղում։

Պիպոյանը հայտնեց, որ «Սպառողների իրավունքների պաշտպանության» մասին ՀՀ օրենքը ընդունվել է 2011 թվականի և վերջին 10 տարվա ընթացքում փոփոխվել 2-3 անգամ՝ մի քանի բառի խմբագրմամբ, մինչդեռ աշխարհն արդեն կարգավորում է արհեստական բանականության և սպառողների իրավունքների հարաբերությունները։

«Իրազեկ և պաշտպանված սպառող» ՀԿ-ի նախագահն անդրադարձավ նաև սպառողների իրավունքների խախտման դեպքերին։

«Սպառողների իրավունքների պաշտպանության գործընթացում կա սկզբունք՝ նախազգուշավորության սկզբունք, այսինքը ոչ թե պետք է ապացուցել, որ վտանգավոր է, այլ քանի չեն ապացուցել, որ անվտանգ է, դադարեցնում են տվյալ օբյեկտի գործունեությունը։ Մեր մոտ տեղի է ունենում թունավորում և 7 օր ռեստորանն աշխատում է, ոչ մեկն այն չի փակում»,- տեղեկացրեց Պիպոյանը։

Նա նշեց, որ բոլորին պարզ էր, որ այդ ռեստորանում է թունավորումը, բայց չէին պարզել, թե աղբյուրը որն է և թույլատրել էին ռեստորանը աշխատի այդ ռիսկի պայմաններում, ինչն անթուլատրելի է։