Ձեր վստահելի աղբյուրը

«Չգիտեմ՝ Հայաստանի իշխանությունները կարդացե՞լ են Եվրախորհրդարանի որոշման մասին, մեր ժողովրդին հույսեր են տալիս, որ Եվրամիության անդամ ենք դառնալու»,- ասում է ՀՀ նախկին արտգործնախարար Վարդան Օսկանյանը իր էջում հրապարակած տեսանյութում։

Ըստ նրա, Եվրախորհրդարանի որոշման մեջ եթե կա մի կետ, որը գործնական նշանակություն ունի մեզ համար, դա 14-րդ կետն է, որը կոչ է անում  Ադրբեջանին նստել բանակցությունների արցախահայության հետ, նրանց ղեկավարության հետ և միջազգային ներկայությամբ ապահովել նրանց վերադարձի խնդիրը իրենց տները, իրենց հողը։

«Ուրեմն մենք սա արհամարհում ենք, մի կողմ ենք դրել, չենք խոսում դրա մասին, ոնց որ դա գոյություն չունի և փորձում ենք այդ փաստաթուղթը թափահարել որպես Հայաստանի ԵՄ-ին անդամակցության վկայական: Հերիք է խաբել այս ժողովրդին, այս բանաձևում մի կետ կա, որը Հայաստանի շահերից է բխում, դա 14-րդն է: Չգիտեմ՝ Հայաստանի արտգործնախարարը կարդացե՞լ է այս փաստաթուղթը:  Բայց ԱԺ-ում իրեն տրված հարցերից կարծես թե ինքը տեղյակ չի:

Հասկանում եմ՝ մի բան եք որոշել դուք, բայց դա ձեր որոշումը չէ: Այսօր մի հատ շանս կա արցախահայության իրենց տները վերադառնալու հարցը իրականութուն դարձնել: Եթե Հայաստանի իշխանությունները մտափոխվեն կամ նոր իշխանություններ լինեն, որոնք այս հարցը օրակարգ կբերեն հենց հենվելով Եվրախորհրդարանի այդ բանաձևի դրույթների հիման վրա»,- ասում է Օսկանյանը։

Նա նշում է, որ սա պատերազմ չի բերի, ընդհակառակը՝ կայուն խաղաղություն կբերի Հայաստանի և Ադրբեջանի միջև:

«Երբ որ արտգործնախարարը ասում է, որ Օսկանյանը փարիսեցիություն է անում, իսկապե՞ս, կարդացե՞լ ես այդ փաստաթուղթը, ԵՄ-ն էլ է փարիսեցիություն անում, կարդացե՞լ ես այդ փաստաթուղթը: Վերցրու 14-րդ կետն ու կարդա, հստակ ասում է: Այդ մարդիկ էլ ինչ անեն, եթե մենք չենք ուզում մեր խնդիրները լուծել, մեր շահերը պաշտպանել»,- ասում է Վարդան Օսկանյանը։