Ձեր վստահելի աղբյուրը

Հայաստանի և Ադրբեջանի միջև սահմանազատման և սահմանագծման գործընթացը մտնում է գործնական փուլ՝ այսօր Տավուշում ասել է վարչապետ Նիկոլ Փաշինյանը:

Փաշինյանը Ոսկեպարում հանդիպել է Ոսկեպարի, Բաղանիսի և հարակից բնակավայրերի բնակիչների հետ, նաև պարզաբանել, թե ինչու է հարցը քննարկվում հենց Ոսկեպարում՝ հենց այդ գյուղի բնակիչների հետ:

Նրա խոսքով՝ սահմանազատման և սահմանագծման գործընթաց սկսելու իրական հնարավորությունը կարող է իրականացվել հենց այդտեղ՝ Բաղանիսից Բերքաբեր հատվածից:

«Գիտեք, որ Ադրբեջանը բարձրաձայնում է 4 գյուղերի մասին։ 4 ոչ անկլավային գյուղերի մասին ենք դեռ խոսում։ Գիտեք, որ մենք բարձրաձայնում ենք 31 գյուղերի մասին, բարձրացնում ենք այդ հարցը, իրենք էլ բարձրացնում են այն հարցը, և երբ մենք ուզում ենք այս քննարկումներում առաջ գնալ, անգամ եթե հենվում ենք այն տրամաբանության վրա, որ մենք 31 բնակավայր ունենք խնդրահարույց վիճակում, իրենք՝ դրանից պակաս, Ադրբեջանն օգտագործում է մի էսպիսի փաստարկ, որ ՀՀ բնակավայրերից ոչ մեկի բուն տարածքը Ադրբեջանի վերահսկողության տակ չէ, այսինքն, գյուղի բնակելի տարածքը Ադրբեջանի վերահսկողության տակ չէ»,- հայտնեց Փաշինյանը։

Նա տեղեկացրել, որ ադրբեջանցիներն առաջարկում են, որ փոխադարձաբար բնակավայրերի բուն տարածքները ազատեն, հետո քննարկեն բնակավայրերի կենսական նշանակության տարածքների մասին։

«Մեր քաղաքականությունն այն է, որ մենք պետք է պատերազմ թույլ չտանք։ Մենք պետք է թույլ չտանք պատերազմի սկսում։ Սա է նաև պատճառը, որ մենք որոշել ենք, որ պետք է գնանք այս հատվածներում Հայաստանի Հանրապոտության սահմանի ճշգրտման»,-հայտարարել է Փաշինյանը և վստահեցրել, որ այն անում են ոչ միայն Հայաստանի Հանրապետության, այլև Ոսկեպար, Կիրանց գյուղերի համար, որպեսզի ապահովեն գյուղերի անվտանգությունը։

Նիկոլ Փաշինյանը հանդիպել է նաև Կիրանցի բնակիչներին: