Ձեր վստահելի աղբյուրը

«Փաշինյանն անսպասելի այց է կատարել Ոսկեպար։ Դրա մասին տեղյակ չեն եղել բնակիչները, վերջին պահին են զգուշացրել։ Նպատակն է եղել՝ բեմականացված շոու սարքել»,- Ազգային ժողովում լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը։

Նա ասաց, որ տավուշցի է, ունի բազմաթիվ ծանոթներ, հարազատներ, որոնց հետ հանդիպումից հետո կապ է հաստատել՝ պարզելու, թե ինչ է քննարկվել։

«Իր սեփական օպերատորն է տարել, որևէ լրատվամիջոց ներկա չի եղել։ Դա խոսում է  այն մասին, որ գնացել են այնտեղ պատկեր ստանալու, բայց չի հաջողվել։

Բազմաթիվ ՔՊ-ակաների, գյուղապետարանի  աշխատողների են հավաքել ու բերել՝ դահլիճը լցնելու, ֆոն ստեղծելու, թե մարդիկ ինչքան գոհ են, որ տարածքները հանձնվում են։
Այն մարդիկ, որոնք իմացել են հանդիպման մասին, գնացել են, մասնակցել են ու Փաշինյանին հարցեր են ուղղել՝ ինչ  տարածքներ ես զիջում, այդ տարածքների վրա դու ամագ ունե՞ս, որևէ մի պատերազմի, ազատագրական պայքարի մասնակցած կա՞ս, քրտինք, արյուն թափած  կա՞ս, որ տարածքներ ես տալիս, թուրքին էլ մոտեցնում ես գյուղի բերեն»,- երեկվա հանդիպման մասին մանրամասներ հայտնեց ընդդիմադիր պատգամավորը։

Նա նշեց, որ այդ տարածքները զիջելու դեպքում աղետների առաջ է կանգնելու Հայաստանը՝ Հայաստան-Վրաստան միջպետական ճանապարհ, կոմունիկացիաներ, գազ, կահավորված առաջնագիծ,  հյուսիսարևելյան  դարպասը բացվում է թշնամու առաջ։

«Փաշինյանն ու ՔՊ խմբակցությունը բերում, թշնամուն կանգնեցում են միջպետական ճանապարհի վրա, անմիջապես գյուղի վրա։ Այդտեղ մանկապարեզ, դպրոց, պետական հաստատություն չի կարողանալու աշխատել։ Այդ տարածաշրջանն ամբողջությամբ դատարկվելու է։ Այդ մասին նաև գյուղացիներն են  փաստել, ասել են՝ թշնամուն բերում ես, հասցնում գյուղի մեջ, այստեղ մա՞րդ է մնալու,  ի՞նչ է՝ խրամատը խոհանացում փորենք։ Տան առաջ մարդիկ խրամատ են փորում»,- ասաց Գ. Դանիելյանը։

Նա վստահ է, որ հասարակության կողմից պետք է ճնշում լինի. «Եթե լինի ճնշում, Փաշինյանը հետ կկանգնի իր որոշումներից»։

Նա ասաց, որ տավուշցիները կտրուկ անհամաձայնություն են հայտնել, ասել են՝ նման բան չի լինի, այդ հրեշավոր որոշումն իրականացնելու դեպքում այդտեղ որևէ մի գյուղ չի կարողանալու բնականոն գտոծունեության ծավալել։

«Իհարկե, կգտնվեն Տավուշում մարդիկ, որոնք կասեն՝ այս ճանապարհը, այս գյուղը մեզ պետք չէ, բայց ասեմ՝ նման մարդիկ փոքրամասնություն են, մի քանի մարդ։ 99 տոկոսը կասի՝ նման դավաճանական ծրագիր հնարավոր չէ իրականացնել ու մարդիկ կատեգորիկ դեմ են»,- ասաց «Հայաստան» խմբակցության պատգամավոր Գ. Դանիելյանը։