Ձեր վստահելի աղբյուրը

Մարտի 20-ին ոստիկանության Տարոնի բաժնում հաղորդում տված վանաձորցի 74-ամյա տղամարդը հայտնել էր, որ ժամը 11.30-ին Վանաձոր քաղաքի Տիգրան Մեծի փողոցի շենքերից մեկի մոտ իրեն էր մոտեցել մի երիտասարդ և ասել, որ ցանկանում է գնել նրա «Լիլիթ» գեղանկարը:

Մերժում ստանալով՝ երիտասարդն, այնուամենայնիվ, ցանկացել էր տեսնել գեղանկարը: Գնացել էին 74-ամյա տղամարդու բնակարան, որտեղ կրկին նկարը վաճառելու և գնի շուրջ խոսակցություն էր ծավալվել:

Ոստիկանությունից մանրամասնում են՝ համաձայնության չէին եկել, ինչից հետո երիտասարդը, իբր տեսնելու նպատակով, վերցրել էր «Լիլիթ» և «Մարիամ Աստվածածին» գեղանկարները և արագ հեռացել:

Տարոնի բաժնի քրեական հետախույզները ձեռնարկած օպերատիվ-հետախուզական միջոցառումների արդյունքում պարզել են, որ գեղանկարները բացահայտ հափշտակել էր վանաձորցի 35-ամյա երիտասարդը:

Մարտի 21-ի ժամը 20.50-ին նա հայտնաբերվել, ձերբակալվել և տարվել է Տարոնի բաժին, որտեղ խոստովանել է հանցանքը և անձնական խուզարկության ժամանակ ներկայացրել գեղանկարները:
Կազմված փաստաթղթերը, երիտասարդը և գողոնը ներկայացվել են Լոռու մարզային քննչական վարչություն:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: