Ձեր վստահելի աղբյուրը

ՌԴ Քննչական կոմիտեի քննիչները սկսել են աշխատել «Կրոկուս Սիթի Հոլ»-ում տեղի ունեցած ահաբեկչության մեջ կասկածվողների հետ։ Այս մասին հայտնում է ՌԴ Քննչական կոմիտեի Telegram ալիքը։

«Բրյանսկի շրջանի հատուկ ծառայությունները, Ուկրաինայի հետ սահմանից ոչ հեռու, ձերբակալել են չորս կասկածյալների, ովքեր ահաբեկչություն են իրականացրել Կրոկուս Սիթի Հոլ»-ում»,- ասվում է Քննչական կոմիտեի հաղորդագրության մեջ։

Ավելի վաղ հաղորդվել էր, որ ՌԴ ԱԴԾ տնօրեն Ալեքսանդր Բորտնիկովը ՌԴ նախագահ Վլադիմիր Պուտինին զեկուցել է 11 մարդու ձերբակալության մասին, այդ թվում՝ ահաբեկչությանն անմիջականորեն մասնակցող բոլոր չորս ահաբեկիչներին։

Հիշեցնենք, որ մարտի 22-ին Պիկնիկ խմբի համերգից առաջ զինված հարձակում է տեղի ունեցել Մոսկվայի «Կրոկուս Սիթի Հոլ»-ի վրա։ Իրավապահ մարմիննեի ոխանցմամբ՝ կամուֆլյաժով առնվազն հինգ մարդ ներխուժել է սրահ և կրակ բացել ավտոմատներից։ Դրանից հետո շենքում հրդեհ է բռնկվել։ Արտակարգ իրավիճակների նախարարությունը հայտնել է, որ հրդեհի մակերեսը կազմել է 12,9 հազար քառ. մ։ Քննչական կոմիտեն գործ է հարուցել ահաբեկչության հոդվածով (Քրեական օրենսգրքի 205-րդ հոդված)։ 

Քննչական կոմիտեի վերջին տվյալներով՝ ահաբեկչության հետևանքով զոհվել է 93 մարդ, սակայն, ըստ վարչության հաշվարկների, այդ թիվը կավելանա։ Զոհերի թվում կան երեխաներ։  Հոսպիտալացվել է 115 մարդ։