Ձեր վստահելի աղբյուրը

Մերձմոսկովյան «Crocus City Hall»-ում տեղի ունեցած ահաբեկչության մեջ մեղադրվողներից մեկը փետրվարին Instagram սոցիալական ցանցում  լուսանկարներ է հրապարակել Ստամբուլից։ Այդ փաստը պարզել է «ՌԻԱ նովոստին»։

Շամսիդին Ֆարիդունին մեկ օրում՝ փետրվարի 23-ին, ութ հրապարակում է արել։ Գրեթե բոլոր լուսանկարներում նշվում է «Աքսարայ, Ստամբուլ» աշխարհագրական դիրքը։
Հրապարակված նկարների մեջ կա անձամբ Ֆարիդունիի լուսանկարը, ինչպես նաև լուսանկարներ, որոնք արված են Ֆաթիհ մզկիթում։

Նա բացատրել է, որ ծնվել է 1998 թվականին Տաջիկստանում, ունի ութ ամսական երեխա։ Մեղադրյալը պատմել է, որ աշխատել է Պոդոլսկի մանրահատակի գործարանում, գրանցված է Կրասնոգորսկում։

ՌԴ քննչական կոմիտեի վերջին տվյալներով՝ զոհվել է 137 մարդ, որից երեքը՝ երեխա։ «Ռոսիա սեվոդնյա» մեդիա խմբի և RT հեռուստաալիքի գլխավոր խմբագիր Մարգարիտա Սիմոնյանը հայտնել է, որ զոհերի թիվը հասել է 143-ի։ Ըստ առկա տվյալների՝ ահաբեկչության հետևանքով տուժել է 182 մարդ։

Տաջիկստանի քաղաքացի Մուհամմադսոբիր Ֆայզովը, որը մեղադրվում է «Crocus City Hall» համերգասրահի վրա հարձակմանը մասնակցելու մեջ, նախկինում վարսահարդար է աշխատել Իվանովոյի վարսավիրանոցում։ Այս մասին ՏԱՍՍ-ի թղթակիցը հայտնել է Մոսկվայի Բասմանի դատարանից, որտեղ քննարկվում է Ֆայզովի ձերբակալության հարցը։

Երկուշաբթի երեկոյան Մոսկվայի Բասմանի դատարանը բոլոր չորս մեղադրյալներին՝ Դալերժոն Միրզոևին, Սաիդակրամի Ռաչաբալիզոդային, Շամսիդին Ֆարիդունին և Մուհամմադսոբիր Ֆայզովին կալանավորել է մինչև մայիսի 22-ը։