Ձեր վստահելի աղբյուրը

«Գոյ» թատրոնն առավոտյան դիմում է ներկայացրել ոստիկանություն, ըստ որի թատրոնի դերասանների ու ստեղծագործական կազմի մուտքը թատրոն արգելվում է։

«Երեկ մենք թատրոնի մուտքին տեսանք «Հարգելի աշխատակիցներ թատրոն կարող եք մտնել ծառայողական մուտքից» գրությունը, չկարողացանք մուտք գործել թատրոն։ Եկան ոստիկաններ։ Կարգը հետևյալն է. քանի որ մեր դիմաց արգելք կա ու չենք կարողանում մուտք գործել թատրոն, պետք է մեր օրինական պահանջը ներկայացնենք ոստիկանություն, որ մենք իրավունք ունենք մուտք գործել թատրոն, ոստիկաններն էլ այդ խոչընդոտը վերացնեն։ Առավոտյան ներկայացրել ենք դիմում ու անհրաժեշտ փաստաթղթեր։ Ոստիկանությունը կքննի և օրենքի ուժով կգա ու կբացի դռները, մենք էլ ներս կմտնենք»,- Panorama.am-ի հետ զրույցում ասաց թատրոնի ռեժիսոր Սարգիս Արզումանյանը։

Նա գնահատմամբ, իրենց մուտքը թատրոն արգելելը հերթական ապօրինի գործողությունն է. «Մարդիկ ապօրինի թատրոնները միացրել են իրար, ապօրինի դադարեցել են մեր գրանցումը պետռեգիստրում։ Հանձնում-ընդունում չի եղել, իրենց մոտ թղթերը չկան։ Կարծում են դռները փակելով ու մեզ այնտեղից  հեռացնելով՝ իրենք կտիրեն այդ փաստաթղթերին։

Ասում են՝ Սունդուկյանի թատրոնի ծառայողական մուտքից մուտք գործեք։ Մենք էլ գնում են այնտեղ, ասում են փաստաթղթերը տվեք, նոր մուտք գործեք։ Ամեն կերպ ուզում են վերցնել փաստաթղթերը։ Մեր վրա ճնշում են գործադրում, որ իրենց անօրինությունն ինչ-որ մի կերպ դարձնեն օրինական։

Սակայն մեր թատրոնի բոլոր դերասանները, ստեղծագործական կազմը ինչպես սկզբում, նաև հիմա, վճռական ենք, համախմբված պայքարում ենք ու կգնանք մինչև վերջ՝ մինչև արդարություն։
Հուսանք՝ լավ կլինի»։

Ս. Արզումանյանն ասաց, որ իրենք, չնայած թատրոնի շուրջ ստեղծված այս իրավիճակին, ստեղծագործական գործունեությունը շարունակում են, փորձեր են անում։

«Ուզում էինք ապրիլ ամսվա խաղացանկը հրապարակեինք, փորձեր էինք անում, բայց երեկ գնացինք, ու, ինչպես ասացի, դուռը փակ էր։ Ճիշտ է՝ հնարավոր չէ տոմսեր վաճառել, բայց մեխանիզմ էինք մտածել, թե ինչպես ներկայացումները խաղանք։ Օրինակ, բարեգործական հիմունքներով. կդրվեր արկղ, հանգանակություն կհավաքվեր, գումարը կտայինք որևէ անապահով ընտանիքի, ...։ Այդպես՝ և մենք կաշխատեինք, և մեր աշխատանքի արդյունքում ինչ-որ մեկին կօգնեինք»։

Հիշեցնենք՝ ԿԳՄՍ նախարարությունից և Գ․ Սունդուկյանի անվան ազգային ակադեմիական թատրոնից հայտնում են, որ «Գոյ» թատրոնի միավորումը Սունդուկյան թատրոնին արդեն իրականություն է։

«Հունվարի 30-ին կառավարության որոշման համաձայն, պետական ռեգիստրը «Գոյ» թատրոնը վերակազմակերպեց՝ միավորելով Սունդուկյան թատրոնի հետ, կա նաև կանոնադարության փոփոխությունը»,-  հայտարարել էր Գ․ Սունդուկյանի անվան ազգային ակադեմիական թատրոնի տնօրեն Վարդան Մկրտչյանը։

«Գոյ» թատրոնի ստեղծագործական ու դերասանական կազմերը դեմ են այդ միավորմանը, հայտարարում են, որ  չեն գնալու աշխատել Սունդուկյանի անվան ակադեմիական թատրոնում։ Նրանք միավորման վերաբերյալ կառավարության որոշումը վիճարկում են դատարանում։