Ձեր վստահելի աղբյուրը

Մոսկվան հուսով է, որ Երևանում կգերիշխի քաղաքական կամքը՝ շարունակելու Ռուսաստանի Դաշնության հետ հարաբերությունների զարգացումը, իսկ երկկողմ հարաբերությունների ներկա բարդ շրջանը հաջողությամբ կանցնի։ «Аргументы и факты» թերթին տված հարցազրույցում ասել է ՌԴ նախագահի մամուլի քարտուղար Դմիտրի Պեսկովը։

«Մենք հուսով ենք, որ Երևանում կտիրի քաղաքական կամք՝ շարունակելու մեր հարաբերությունների զարգացումը, և մենք հաջողությամբ կանցնենք այս դժվարին շրջանը»,- ասել է նա: 

Պեսկովը նաև նշել է, որ Ռուսաստանը և Հայաստանը մնում են եղբայրական երկրներ՝ չնայած հարաբերություններում առկա դժվարություններին։

Նրա խոսքով, Հայաստանը Ռուսաստանի Դաշնության համար «նույնիսկ ավելին է, քան եղբայրական երկիր», թեև երկու երկրներն այժմ ապրում են «հարաբերությունների բավականին բարդ շրջան»։

«Դա նույնիսկ ավելին է, քան եղբայրական, քանի որ այստեղ ավելի շատ հայեր են ապրում, քան բուն Հայաստանում»,- ընդգծել է նա։

Պեսկովն ասել է, որ ՌԴ-ում ապրող հայերի տնտեսական ակտիվությունը Հայաստանի  ընդհանուր բյուջեում շատ մեծ տոկոս է կազմում. խոսքը տարեկան մի քանի միլիարդ դոլարի մասին է։