Ձեր վստահելի աղբյուրը

Կառավարության նիստում այսօր Նիկոլ Փաշինյանը հայտարարել է, որ ԼՂ-ից բռնի տեղահանված որոշ շրջանակի կողմից կամա թե ակամա արվող  գործողություններն ու քայլերը սպառնալիք են ստեղծում ՀՀ ազգային անվտանգության համար. «Հայտարարում են ինչ-որ վտարանդի կառավարությունների և այլնի մասին: Ես ուզում եմ շատ հստակ հայտարարել, որպեսզի բոլորի համար պարզ լինի՝ Հայաստանի Հանրապետությունում կա մի կառավարություն և այդ կառավարությունը նստած է այս դահլիճում»։  Ադրբեջանական լրատվամիջոցներում, թելեգրամյան ալիքներում արդեն տարածվել է Փաշինյանի այս հայտարարությունը։ Մեկնաբանություններից մեկի համաձայն՝ «Շահրամանյանի՝ ֆրանսիական թերթերից մեկին տված հարցազրույցից հետո Փաշինյանը կատաղել է...»։

Panorama.am-ը զրուցեց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանի հետ, թե ինչպես կմեկնաբանի Փաշինյանի հայտարարությունը։

Մետաքսե Հակոբյան-Մենք փաստում ենք, որ Արցախի Հանրապետություն գոյություն ունի, որն օկուպացված է թշնամու՝ Ադրբեջանի կողմից։ Զենքի,  ցեղասպանության վտանգի ներքո, բռնի տեղահանման հետևանքով այսօր Արցախն  առանց հայերի օկուպացված է։ Խոսելով Արցախի պետական ինստիտուտների պահպանման, դրանց գործունեության մասին, մենք ունենք լոկ մեկ նպատակ, որ Արցախ վերադարձի  դեպքում, որովհետև մեր բոլոր քայլերը, գործողությունները, նույնիսկ եթե խոսքը սոցիալական ծրագրերի մասին է, մեկ նպատակ ունի՝ վերադարձ Արցախ։ Վերադարձ Արցախ կամ Արցախ հային վերադարձնելու դեպքում պետք է Արցախի իշխանություններն առանց ընդհատման շարունակեն իրենց գործունեությունը, որովհետև Արցախի պետական ինստիտուտները, ըստ էության, իրենք կան, գոյություն ունեն։ Իմ բոլոր գործողությունները, գործառույթները որպես ԱԺ պատգամավոր, իրականացնում եմ զուտ մեկ նպատակով՝ Արցախ վերադարձ, և ես պետք է հետո հնարավորություն ունենամ շարունակելու իմ գործունեությունը ի բարօրություն իմ հայրենիքի։

Մեր որևէ գործողություն, որևէ քայլ չի կարող վտանգ ներկայացել Հայաստանի համար, որովհետև մենք երբևէ առանձին ինչպես այստեղ, այնպես էլ Արցախում,  չենք դիտարկել Արցախ, Հայաստան՝ գիտակցելով, որ ունենք երկու հայկական պետություն, բայց մեկ ընդհանուր հայրենիք։ Որևէ կերպ մեզ համար Արցախն առավել չէ, քան Հայաստանը և հակառակը՝ Հայաստանը չի կարող առավել լինել, քան Արցախը։ Հետևաբար, մեր բոլոր քայլերը, որոնք արել ենք կամ շարունակելու ենք անել, հաշվարկված են ամենայն ճշտությամբ և  չեն կարող վնաս լինել Հայաստանին, այլ հակառակը՝ օգուտ Հայաստանի են։ 

Panorama.am-Փաշինյանի այսօրվա հայտարարությունը ինչի՞ հետ եք կապում։ Ի դեպ, այն արդեն ողջունում են Ադրբեջանում, ադրբեջանական լրատվամիջոցներում բուռն արձագանքի է արժանացել։

Մետաքսե Հակոբյան-Բնականաբար,  փոխադարձ ողջույններով է պայմանավորված իրենց բոլոր քայլերը։ Կարող եմ ենթադրություններ շատ անել, օրինակ, երեկ Արցախի Հանրապետության նախագահը հարցազրույց էր տվել ֆրանսիական լրատվամիջոցի։ Կարող եմ տարբեր ենթադրություններ անել, բայց զերծ կմնամ։ Վստահ լինելով, որ Հայաստանի իշխանությունն, ի դեմս ղեկավարի, ծրագիր ունի, որը միտված չէ ի բարօրություն Հայաստանի և այդ բոլոր գործողությունների արդյունքը մենք օր-օրի գրանցում ենք, դա Արցախի՝ այս պահին փաստացի օկուպացված լինելն է, նաև Հայաստանի թուլացումը, անընդհատ կեղեքումը, ծվեն-ծվեն լինելը։ Ծրագրեր են, որոնք ողջ թափով քաղաքական բռնաճնշումների, տարբեր տեսակի բռնությունների ենթարկելու հետևանքով հստակ, ուղիղ գծած ճանապարհով գնում են։

Panorama.am- Փաշինյանը հայտարարել էր, որ «անհրաժեշտության դեպքում պետք է արվեն նաև համապատասխան քայլեր և ձեռնարկվեն համապատասխան միջոցներ, որպեսզի նաև արտաքին ուժերը որոշ շրջանակների Հայաստանի անվտանգության համար սպառնալիք ստեղծելու համար չօգտագործեն», ի՞նչ քայլերի մասին կարող է խոսք լինել՝ ճնումներ, նաև կալանավորումներ։

Մետաքսե Հակոբյան- Կարծում եմ՝ այլևս որևէ նման քայլից զարմանալու առիթ պետք է չունենանք։ Այն պահից, երբ իշխանազավթում տեղի ունեցավ Հայաստանում, այդ պահից սպառնալիքներ անընդհատ հնչել են, ամենաառաջին հնչեղ հնչած սպառնալիքը  2019-ին Ստեփանակերտի Վերածննդի հրապարակում Փաշինյանի բղավոցներն էին, որ «Արցախը Հայաստան է և վերջ»։ Ուղիղ սպառնալիք էր հայկականությանը, հայկական երկու պետություններին։ Իրենց սպառնալքիները տարբեր տեսակի են, ոճի ու անընդհատ են։

Panorama.am-Շնորհակալություն հարցերին պատասխանելու համար։