Ձեր վստահելի աղբյուրը

«Հայաստանի Հանրապետությում՝ Վայոց Ձորում, Սյունիքում, Գեղարքունիքում մենք ունենք Ադրբեջանի կողմից բնակիչների մեկուսացումներ։ Ադրբեջանական զինծառայողները եկել, ինչ-որ ձև մոտեցել են մեր գյուղերին և քաղաքներին, խոսքը չի վերաբերում միայն ներխուժումներին»,-ասաց «Իրավունքների և արդարության կենտրոն «Թաթոյան» հիմնադրամի ղեկավար Արման Թաթոյանը՝ ելույթ ունենալով «Արցախի նկատմամբ 2023թ. սեպտեմբերյան հարձակումների ընթացքում ադրբեջանական ռազմավարությունը, Արցախից բռնի տեղահանվածների վերադարձի իրավունքը, հայերի կամայական ազատազրկումներն Ադրբեջանում և Հայաստանի սահմանային անվտանգության մարտահրավերները» թեմայով պանելային քննարկմանը։

Նա ընդգծեց, ադրբեջանական զինվորների ցանկացած ներկայություն ամբողջությամբ խաթարում է մեր բնակիչների անվտանգությունը, ավերում է մարդկանց նորմալ կյանքը։

«Փետրվարի 13-ի միջադեպի հետ կապված, ես փաստերով Ներքին Հանդ գյուղի օրինակով կներկայացնեմ, թե ինչ վիճակ է։ Գյուղը երեք կողմից շրջափակված է ադրբեջանական զինվորներով։ Մեր աշխատանքային խումբը հաշվել է, միայն 25 զինված մարտական դիրք կա փոքր Ներքին Հանդ գյուղը շրջափակած։ Մեր փաստահավաք աշխատանքի արդյունքում պարզել ենք, թե որ մարտական դիրքերից են սպանվել մեր զինծառայողները։ Դիրքերից մեկը շատ մեծ ներխուժում ունի Հայաստանի Հանրապետություն՝ 2 կմ խորությամբ գտնվում է Հայաստանի տարածքում։ Ադրբեջանցիների ներխուժումից  հետո գյուղի դպրոցը, ակումբը ու այլ կառույցներ գտնվում են ադրբեջանցիների օկուպացիայի ներքո, պարզ լսվում են ադրբեջանցիների զինծառողների խոսակցությունները։ Մեր երեխաները սովորում են ադրբեջանցի դիպուկահարների հսկողության ներքո։ Նրանք փակել են ջրի ակունքը, ինչի հետևանքով մարդիկ օգտագործում են գետի ջուր՝ խմելու համար, չեն կարողանում այցելել իրենց հարազատների շիրիմներին, այգիները, արոտավայրերը, ամբողջը գտնվում են ադրբեջանցիների վերահկսողության ներքո։ Միայն Ներքին Հանդ փոքր, բայց մեծ ռազմավարական նշանակության գյուղից 2700 հա գտնվում է  ադրբեջանական օկուպացիայի ներքո։ Դրանից 2400 հա-ն հատուկ պահպանվող հողեր են, 170 հա-ն անտառային հողեր են, 130 հա-ն համայնքային հողեր»,-ասաց Թաթոյանը։

Նրա խոսքով, ևս 1000 հա-ն գտնվում է վտանգավոր գոտում, որը հնարավոր չէ օգտագործել, բացի այդ, ադրբեջանցիներն ավերում են Հայաստանի բնությունը, հատում անտառները։

«Կրակում են, թույլ չեն տալիս, որ մարդիկ մոտենան իրեն հողերին։ Սա էլ է օկուպացիա։ Գեղարքունիքում, Սյունիքում մենք տեղեր ունենք, որ ծուղակ են դարձել՝ ադրբեջանական զինծառայողների անօրինական արարքների պատճառով»,-ասաց նա։