Ձեր վստահելի աղբյուրը

«Եթե Արցախի պաշտպանության բանակի հրամանատար Միքայել Արզումանյանը չգար Հայաստան, Հայաստանի իշխանությունները նրան կալանավորած չլինեին, հիմա, ըստ քեզ, որտե՞ղ կլիներ»,-«Հրապարակ» օրաթերթի խմբագիր Արմինե Օհանյանին նման հարց ուղղեց լրագրող Ավետիս Բաբաջանյանը։

«Բաքվի բանտում»,-արձագանքեց Արմինե Օհանյանը։

«Իհարկե, Բաքվի բանտում։ Հիմա որտե՞ղ է, Հայաստանի բանտում։ Արդյոք դրանից կարո՞ղ ենք ենթադրություն անել, որ Հայաստանի ու Ադրբեջանի իշխանություններն այդ մարդկանց նկատմամբ վարում են նույն քաղաքականությունը»,-արձագանքեց Բաբաջանյանը։

«Ճիշտ է, ես մի քիչ այլ վերաբերմունք ունեմ Դավիթ Տոնոյանի նկատմամբ, բայց դա վիրավորական է։ Երկրի պաշտպանության նախկին նախարարը, նախկին փոխնախարարը լավ, ինչի՞ համար է նստած այդ մարդը, երբ գործով անցնող բոլոր անձինք բաց են թողնված։ Տոնոյանը երեք տարի նստած է։ Սա խայտառակություն է, առանց դատարանի վճռի մարդիկ տարիներով նստում են, քաղբանտարկյալը հենց այդպես է լինում, էլ ո՞նց է լինում»,-ասաց Ա. Օհանյանը։

Անդրադառնալով «Իմնեմնիմի» պոդքասթի վարող Նարեկ Սամսոնյանին ու Վազգեն Սաղաթելյանին ազատությունից զրկելուն՝ Օհանյանն ընդգծեց, նրանք նստած են հայհոյանքի համար, որն ապաքրեականացված է։

«Հայհոյանքի սուբյեկտը, ով վիրավորվել է, պետք  է գնար, դիմեր դատարան, ասեր՝ ես պահանջում եմ փոխհատուցում և ներողություն խնդրեր ինձանից։ Բայց քանի որ Նիկոլ Փաշինյանն է վիրավորվածը, նա չի կարող գնալ հայց ներկայացնել, նրա պաշտպանությանը լծված է ողջ իրավապահ համակարգը՝ դատախազությունով, քննչական կոմիտեով, բոլորը լծված են այդ գործին, ինչպե՞ս անել, որ երկրի ղեկավարին ոչ մեկ չհայհոյի, թթու խոսք չասի»,-ասաց Արմինե Օհանյանը։