Ձեր վստահելի աղբյուրը

«Թուրքիայում ընդդիմությանն ընտրածների մեջ վստահաբար կա մի հատվածը, որն ընտրել է իր վերելակը, շքամուտքն ապահովող քաղաքապետի»,-Panorama.am-ի հետ զրույցում նման համոզմունք հայտնեց ԵՊՀ արևելագիտության ֆակուլտետի դեկան Ռուբեն Մելքոնյանը՝ անդրադառնալով Թուրքիայի ՏԻՄ ընտրություններում ընդդիմության տարած հաղթանակին։

Թուրքագետի խոսքով, այս ընտրություններում ընդդիմության թեկնածուները շատ ավելի մրցունակ ու հաջողությունների պատմություն ունեն, ինչպես օրինակ, Ստամբուլի, Անկարայի քաղաքապետերը, նրանք կարողացել են ադեկվատ արձագանքել հասարակության սոցիալական, տեխնիկական, գաղափարախոսական հարցերին, և հասարակությունը գոհ էր նրանցից որպես քաղաքապետ։

«Մինչդեռ իշխանությունը նման թեկնածուներ չէր առաջադրել և ավելի շատ հույսը Էրդողանի կերպարի ու նրա ռեսուրսների վրա էր, մինչդեռ սա նախագահական ընտրություններ չէին, և քաղաքացիների մեծ մասն ընտրում էր իրենց համար կոմֆորտ իրավիճակ ստեղծող վարչարարի»,-մանրամասնեց Մելքոնյանը։

Ընդդիմության հաղթանակի գործում հաջորդ կարևոր  հանգամանքը Paorama.am-ի զրուցակիցը համարում է ընդդիմադիր ուժի՝ «Ժողովրդահանրապետական» կուսակցության գաղափարախոսության տրանֆորմացիան։

«Այդ գաղափարախոսության մեջ մի շարք նոր տարրեր են մտել, որոնք նաև հասարակության տարբեր շերտերի են գրավել դեպի իրենց կողմը»,-ասաց Մելքոնյանը։

Մյուս գործոնն այն է, որ իշխանության իսլամական բուրգը միասնական չգործեց, Էրդողանի խորհրդարանական դաշնակիցը՝ «Կրկին բարօրություն» կուսակցությունը, ըստ էության, հանդես եկավ Էրդողանի դեմ, ավելին ցույց տվեց, որ Էրդողանի իսլամական խոսույթը և Իսրայելի դեմ խոսույթը կեղծ են։

Անդրադառնալով ընտրություններից հետո Թուրքիայում հնարավոր զարգացումների վերաբերյալ հարցին՝ Ռուբեն Մելքոնյանն ասաց՝ հիմա ընդդիմությունը ոգևորված է, ուզում են արտահերթ խորհրդարանական, նախագահական ընտրություններ, որոնցում մի քանի ամիս առաջ իրենք պարտվել են։

«Էյֆորիան բնական է, քաղաքական տրամաբանությունից է բխում։ Բայց չի կարելի միանշանակ ասել, որ սա ընդդիմության հաղթանակն է Էրդողանի հանդեպ։ Սա տարբեր շերտեր ու վեկտորներ ունի, միանշանակ գնահատելը սխալ է։ Հիմա արդեն հաղթողներն իրար հետ են մրցում, թե ում շնորհիվ է եղել այս հաղթանակը»,-նշեց նա։

Մելքոնյանի կարծիքով, Թուրքիայում իշխանական  բուրգն ընտրությունների այս արդյունքներից չի փլուզվի, սակայն  լրջագույն վերաարժևորման փուլ է սկսում, սակայն պայքարն ընթանալու է հետէրդողանական Թուրքիայի համար։

«Այս հարցում Էրդողանի ժառանգները լրջագույն խնդիրներ են ունենալու ընդդիմադիր թեկնածուների հետ պայքարելու գործում։ Ավելի հստակ ասեմ, եթե Ստամբուլի քաղաքապետ Էքրեմ Իմամօղլուն առաջադրվի նախագահի թեկնածու, ապա իշխանության որևէ թեկնածուի համար լինելու է մեծագույն խնդիր։ Հիմա ուրվագծվում է հետէրդողանական Թուրքիայի պայքարի մոտավոր կոնտուրները»,-նշեց Մելքոնյանը։

Պատասխանելով հարցին, թե ինչ արդյունքներ կունենան Թուրքիայում կայացած ընտրություններն ու դրանց արդյունքները Հայաստանի հետ հարաբերությունների, այդ երկրի արտաքին քաղաքականության վրա, թուրքագետն ասաց՝ իշխանությունն ավելի շատ կենտրոնանալու է ներքին, սոցիալական խնդիրների վրա, քանի որ էրդողանական Թուրքիայի աքիլեսյան գարշապարը տնտեսությունն է, մարդիկ դժգոհ են տնտեսական վիճակից։

«Այս առումով միգուցե արտաքին քաղաքական խնդիրների նկատմամբ ուշադրության որոշակի նվազում արձանագրվի, որոշակի։ Սա չի նշանակում, որ Հայաստանի նկատմամբ վերաբերմունքը փոխվելու է, բայց քաղաքական առաջնահերթությունները կարող են փոխվել, և երկրորդը, այդ իրավիճակում կարելի է կանխատեսել, որ հետէրդողանական Թուրքիայում կլինի այլ քաղաքական իրավիճակ, այլ քաղաքական թելադրողներ, որոնց հետ բանակցելը, հարաբերություններ ունենալը կլինի շատ ավելի տարբեր, քան կարծր հակահայկական , բռնատիրական բոլոր ֆունկցիաներն իր մեջ ներառող Էրդողանի հետ։ Եվ եթե Հայաստանում լինի նորմալ իշխանություն, ոչ թե այս իշխանությունը, Թուրքիայի հետ շփման հնարավորություններ կարող են բացվել»,-ասաց Մելքոնյանը։

Մանրամասները՝ ձայնագրությամբ։