Ձեր վստահելի աղբյուրը

Փաստաբանների պալատի նախկին նախագահ Արա Զոհրաբյանը փետրվարի վերջին ֆեյսբուքյան գրառմամբ տեղեկացրեց՝  7-րդ դասարանի երեխաների ծնողների հետ միասին հայց են ներկայացրել ՀՀ վարչական դատարան ընդդեմ ԿԳՄՍ նախարարության։

Panorama.am-ը գնացել է հայտարարության հետքերով՝ պարզելու, թե ինչ ճակատագիր ունեցավ հայցը։

Այն վարչական դատարանը ստացել է փետրվարի 26-ին։ Որպես հայցվոր հանդես են եկել  Արա Զոհրաբյանը, Սիրանուշ Պողոսյանը, Աստղիկ Բաղդասարյանը, Տաթև Խաչատրյանը։

Նրանք դատարանից պահանջում են անվավեր ճանաչել Ժաննա Անդրեասյանի՝ 03.08.2023թ. թիվ 1342-Ա/2 հրամանով հաստատված «2023- 2024թթ. ուսումնական տարում հանրակրթական ծրագրեր իրականացնող ուսումնական հաստատություններում 2-րդ, 5-րդ, 7-րդ դասարանների հանրակրթական առարկաների գործածության երաշխավորված դասագրքերի օգտագործման ժամկետները և ցանկը» հավելվածի «ՅՈԹԵՐՈՐԴ ԴԱՍԱՐԱՆ» բաժնի «10»-րդ տողն (կետը)։

Հրամանի այդ տողը վերաբերում է Սմբատ Հովհաննիսյանի հեղինակած «Հայոց Պատմություն» դասագրքին։

Նույն օրը գործը մակագրվում է դատավոր Ելենա Առաքելյանին։ Վերջինը մարտի 1-ին որոշում է կայացնում ներկայացված հայցադիմումի ընդունումը մերժելու մասին՝ հիմնավորելով, որ դատավարական ժամկետը բաց է թողնվել։

Սահմանված ժամկետում հայցվոր կողմը  դիմում է Վերաքննիչ վարչական դատարան՝ հայցադիմումի ընդունումը մերժելու մասին որոշման դեմ։ Գործը մակագրվել է դատավոր Կարեն Գևորգյանին։

Panorama.am-ի հետ զրույցում փաստաբան Արա Զոհրաբյանն ասաց՝ դատարանը չի ընդունել հայցը՝ նշելով, թե ինչո՞ւ է օգտոստին ընդունված հրամանը բողոքարկվում հունվարին։

«Դատարանն ասում է՝ հրամանն ընդունվելուց երկու ամիս անց պետք էր դիմել դատարան։ Իսկ մենք հակադարձում ենք՝ այդ հրամանը մենք չենք ստացել։ Այն ստացել ենք հունվարին հարցումների արդյունքում։ Հիմա դիմել ենք Վերաքննիչ վարչական դատարան՝ բերելով մեր փաստարկները։ Մենք ակնկալում ենք, որ դատարանն արդարադատություն կիրականացնի։ Ես կարծում եմ՝ իրականում իրավական հիմքերը բավարար են, որ կրթության, գիտության և չգիտեմ ինչ նախարարության այդ հրամանը ճանաչվի անվավեր»,-ասաց հայցվոր Զոհրաբյանը՝ նշելով, որ փորձելու են բախել բոլոր հնարավոր դռները՝ հասնելու այդ դասագրքի չեղարկմանը։

Նրա խոսքով, 7-րդ դասարանի «Հայոց պատմություն» դասագրքի վերաբերյալ երկու հայց կա ներկայացված, որոնք փոխկապակցված են։

«1342-Ա/2 հրամանի վիճարկվող տողում ի սկզբանե նշված է եղել երկու գիրք՝ մեկն այս վիճահարույց գիրքն է՝ Ս. Հովհաննիսյանի հեղինակությամբ, մյուսը նորմալ դասագիրք է, որով անցել են նախինում։ ԿԳՄՍ նախարարությունը նորմալ դասագիրքը հանել է հրամանից՝ հասկանալով, որ բոլոր դպրոցներում այն դասագրքով կանցնեին առարկան։ Մի առանձին հրաման կա այդ մասին, դա էլ ենք վիճարկել։ Փաստորեն անօրինական կերպով նախկին դասագիրքը դուրս են թողել շրջանառությունից։ Եթե այս հայցը բավարարվի ու դասագրքերի ցանկում վերականգնվի նախկին դասագիրքը, ապա շատ դպրոցներում կանցնեն այդ դասագրքով»,- ասաց Ա. Զոհրաբյանը։

Նշենք, որ խոսքը վերաբերում է Ժ. Անդրեասյանի կողմից ստորագրած 2023 թվականի օգոստոսի 3-ի թիվ 1342-Ա/2 հրամանում փոփոխություն կատարելուն, որով ուժը կորցրած են ճանաչվել հանրակրթական դպրոցների 2-րդ, 5-րդ, 7-րդ դասարանների համար երաշխավորված մի շարք դասագրքերի՝ այդ թվում Հայոց պատմություն առարկայի նախկին դասագրքի օգտագործման ժամկետները։

Իրավական այս ակտի դեմ հայց ներկայացրել է «Հայ ասպետ» կրթադաստիարակչական բարեգործական հիմնադրամի ներկայացուցիչ Տիգրան Գրիգորյանը։ Հայցն ընդունվել է վարույթ։ Դատաքննությունը նշանակվել է մայիսի 14-ին։