Ձեր վստահելի աղբյուրը

«Մենք փոխվել ենք, միֆեր, առասպելներ չեն այն, որ հայը նախկինում այլ տիպի մարդ է եղել, արաբներն են ասել՝ հայերը շատ լավ զինվորական են, բայց շատ վատ առևտրական, որովհետև խաբել չգիտեն, փաստորեն սովորեցինք խաբել, այդ փոփոխությունը հօգուտ մեզ չէ, իհարկե մենք գիտենք, որ կռվել շարունակում ենք, այդ որակը մեր մեջ դեռ չի սպանվել՝ չնայած այդ ուղղությամբ ջանքեր գործադրվում են. և ֆիզիկապես է սպանվում քաջ հայը, և հոգեբանորեն. տեղեկատվական դաշտում քաջ հայը այլափոխվում է զվարճացող, խաբող հայի։ Փակելով բանակը, բացելով խանութներ, Հայաստանը խաչմերուկ դարձնելով՝ մենք մեզ դարձնում ենք այդ երկրորդ տիպի հայը՝ խաբող հայը և պատահական չէ, որ այդ նախագիծը հավանության է արժանանում հենց խաբող հայերի շրջանում,- «Օբյեկտիվ» հաղորդմանն ասել է քաղաքական գիտությունների դոկտոր, պրոֆեսոր, ԵՊՀ կիրառական սոցիոլոգիայի ամբիոնի վարիչ Արթուր Աթանեսյանը։

«Երբ մենք ինքներս ենք քննարկում ՝ ով է հայը՝ մենք վախենում ենք ինքնաքննադատությունից, մեկս մյուսին հասկանալով միշտ խնայել ենք, մի բուռ հայ ենք ասելով վատը կոծկել ենք. դա դրսևորվել է բոլոր ոլորտներում։ Եթե մեզ հետ մեր որակների մասին խոսեին այլազգիներ, ապա լավը, այո, կընդծվեր, բայց կցուցադրվեր նաև վատը և դա կլիներ ավելի օբյեկտիվ տեսանկյուն։

Մենք սկսել ենք թուրքերին ու ադրբեջանցիներին դուր գալ, ինչը վատ նշան է, ավելի լավ է մեզ քննադատեին, եթե մեզ գովում են, պիտի վախենանք դրանից։ Բայց մյուսների հետ մեր մասին քննարկումները շատ օգտակար կարող են լինել, մենք մեր մասին շատ միֆեր ունենք։ Ուրիշների համար ընկալելի լինելը և դուր գալը տարբեր բաներ են. այն, ինչ անում է Հայաստանի վարչապետը, թուրքերին դուր գալու փորձերն են, այնինչ, ամեն ինչ պիտի աներ հայերիս դուր գալու համար. նշաձող բարձրացնելը դուր կգար մեզ, բայց նա իջեցնում է նշաձողը՝ դուր գալով թուրքերին։ Իմ մոտեցումը սա է՝ հաղորդակցվել մյուսների հետ՝ հասկանալու՝ ինչու իջեցրինք նշաձողը, ինչպես բարձրացնել այդ նշաձողը, ինչ աշխատանք տանել, ինչպես վերականգնվել»։

Զրույցն ամբողջությամբ՝ տեսանյութում։