Ձեր վստահելի աղբյուրը

«Հայաստանի Հանրապետությունը իրավիճակի լարվածությամբ, էսկալացիայով շահագրգռված չէ»,- Հանրային հեռուստաընկերությանը տված հարցազրույցում ասաց ՀՀ ԱԳ նախարար Արարատ Միրզոյանը՝  արձագանքելով Ադրբեջանի ՊՆ-ի տարածած ապատեղեկատվությանը, թե Հայաստանը «զորքեր է կուտակում» սահմանին։

Ինչ վերաբերում է ապրիլի 5-ի գիշերը հայկական բնակավայրերի ուղղությամբ Ադրբեջանի արձակած կրակոցներին, Արարատ Միրզոյանն ասաց. «Այս անկանոն կրակոցները ոչ մի կերպ չեն նպաստում խաղաղության գործընթացին և հասկանալի էլ չեն մեզ համար։ Մի կողմից մենք նստում ենք լուրջ բանակցությունների սեղանի մոտ, խաղաղության գործընթաց ենք ձեռնարկում և ամբողջ աշխարհին ասում ենք, որ մենք խաղաղություն ենք ուզում, ադրբեջանական կողմն էլ գալիս է, միջնորդներին կամ հանդիպումը կազմակերպողներին, կամ մեզ՝ երկկողմ հանդիպումների ժամանակ հավաստիացնում, որ խաղաղություն է ուզում կառուցել, մյուս կողմից՝ ահա այսպիսի միջադեպեր սահմանին, տեղեկատվական արշավ, պատրվակների ստեղծում էսկալացիայի համար․․․

Ես ուզում եմ մի անգամ էլ ասել՝ մենք փորձում ենք խաղաղություն կառուցել։ Հայաստանի Հանրապետությունը հավատարիմ է խաղաղության օրակարգին։ Բայց սա անելու համար մենք պետք է պատրաստակամություն տեսնենք մյուս կողմից ևս»։

Պատասխանելով «խաղաղության պայմանագրի» մասին հարցին, ԱԳ նախարարն ասաց. «Խաղաղության պայմանագրի 2 հիմնական հարցում կողմերի պատկերացումները հեռու են միմյանցից՝ տարածքային ամբողջականության փոխադարձ ճանաչում ու հետագա սահմանազատում, ենթակառուցվածքների ապաշրջափակում»։