Ձեր վստահելի աղբյուրը

«Նախօրեին  կարևոր հանդիպում տեղի ունեցավ Բրյուսելում։ Երբևէ այսպիսի ձևաչափով՝ ԱՄՆ-ԵՄ-ՀՀ հանդիպում չէր եղել, համենայն դեպս ՀՀ-ի հետ հարաբերությունների առումով»,-Հանրային հեռուստաընկերությանը տված հարցազրույցում ասաց ՀՀ արտաքին գործերի նախարար Արարատ Միրզոյանը։

Նա նշեց, որ այս հանդիպումը չափազանգ կարևոր հանգրվան էր ԱՄՆ-ի և ԵՄ-ի հետ մեր հարաբերությունների խորացման գործընթացի համատեքստում։ 

«Սա ոչ սկիզբն էր, ոչ էլ ամենևին ավարտը, հանգրվաններից մեկը, կարևոր գործընթացի մաս»,- ընգծեց նա։ 

Հարցին՝ ի՞նչ գործընթացի մասին է խոսքը, Ա. Միրզոյանը պատասխանեց. «Սերտացնում ենք մեր հարաբերությունները ԱՄՆ, ԵՄ հետ»։ 

Նա նշեց, որ համատեղ հայտարարության մեջ հստակ ուղղություններ են  նշվում՝  սկսած ՀՀ ինքնիշխանության և տարածքային ամբողջականության սատարումից, սա ամենակարևոր քաղաքական հայտարարությունն է, որի կարիքը ունեն, խոսվում է տնտեսական հնարավորությունների դիվերսիֆիկացման մասին։

Ինչ վերաբերում է ԵՄ-ի կողմից Հայաստանին կտրամադվելիք 270 միլիոն եվրոյի դրամաշնորհի մասին, Միրզոյանն ասաց. «Պետք չէ առանձնացնել գումարը ապրիլի 5-ի մնացած կետերից։ Պետք չէր ի սկզբանե ակնկալել, տեսա, որ մինչև հանդիպումը շահարկումները շատ էին, որ ԵՄ-ն ու ԱՄՆ-ն շատ ավելի մեծ միանվագ գումար են տալու որպես աջակցություն Հայաստանի տնտեսությանը։

270 մլն եվրոյից բացի, չմոռանանք 2,6 միլիարդի մասին։ Դրանք ուղղվելու են, օրինակ, հայկական արտադրատեսակների ստանդարտների բարձրացմանը։

Սա մեծ գործընթացի մաս է միայն, կարևոր մաս, սրանով ոչ սկսվեց, ոչ էլ ավարտվեց, այնպես չէ, որ մինչ այդ չկային գումարներ ու հետո չեն լինելու»։

Նա նշեց, որ ապրիլի 5-ի միջոցառման ընթացքում քննարկումների սեղանին ռազմական բաղադրիչ չի եղել, բայց ՀՀ դիմակայունության ավելացումը, ի վերջո, նաև անվտանգային դիմակայություն է դառնում։