Ձեր վստահելի աղբյուրը

«Հետաքրքիր էր դիտարկել, թե ապրիլի 5-ի հանդիպման շուրջ ինչպես են որոշ նարատիվներ համահունչ զարգացվում Հայաստանի  որոշ շրջանակների կողմից, Ադրբեջանում և ՌԴ-ում որոշ շրջանակներում»,- Հանրային հեռուստաընկերությանը տված հարցազրույցում ասաց արտգործնախարար Արարատ Միրզոյանը։

Նա նշեց՝  ապրիլի 5-ին քննարկվել ու ընդունվել է այն հայտարարությունը, որը Հայաստանը պատրաստվում էր ունենալ. «Չի եղել այլ բաղադրիչ, որը քննարկել ենք, չի ստացվել։
Մենք չէինք բանակցում և չէինք գնացել ՆԱՏՕ-ի զորք Հայաստան բերելու ու դա չստացվեց։ Այդ շրջանակներին ի սկզբանե  էլ հայտնի էր, որ նման բան չի բանակցվելու։ Միտումնավոր էին տարածում, որ հետո ասեին՝ կամ մեր ջանքերի արդյունքում չստացվեց, կամ իշխանությունը չկարողացավ»։

Ա.Միրզոյանն ասաց, որ Բրյուսելում ապրիլի 5-ի հանդիպումն ուղղված չէ որևէ երրորդ երկրի դեմ. «Հայաստանը,  որպես ինքնիշխան պետություն, իրավունք ունի խորացնել հարաբերություններն այն երկրի կամ կողմի հետ, որի հետ ուզում է։ Չեմ ուզում մեկնաբանել արձագանքները։ Արդյունքներն էլ հանդիպման ցույց են տալիս, որ որևէ երրորդ կողմի դեմ ուղղված չի»։

Հարցին՝ Իրանի հետ կարողանո՞ւմ են երկխոսել, որ սրա մեջ հակաիրանական ուղղվածություն չկա, Միրզոյանն ասաց. «Բարեկամանական հարաբերություններ ունենք Իրանի հետ։ Գրեթե բոլոր ոլորտների վերաբերյալ բավականին արդյունավետ երկխոսություն ունենք, մշտական կապի մեջ ենք, որևէ թյուրըմբռնում չկա, որևէ բացասական արձագանք ապրիլի 5-ի հանդիպման վերաբերյալ Իրանից չենք լսել»։