Ձեր վստահելի աղբյուրը

«Տավուշում չափազանց բարդ իրավիճակ է, բայց դա այստեղի ժողովրդի համար նորություն չէ, առաջին արցախյան պատերազմի ժամանակ էլ դուք ձեր մաշկի վրա եք զգացել պատերազմի դժվարությունները, դառնությունները, դաժանությունները և կարողացել եք հակառակորդին ծնկի բերել»,- Ոսկեպարում բնակիչների հետ հանդիպման ժամանակ ասել է ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը:

Ըստ նրա, 2020-ի պատությունից հետո այլ իրավիճակ է, թուրք-ադրբեջանական տանդեմը օղակը Հայաստանի շուրջ կամաց-կամաց սեղմում է. «Այս ամենը տեղի է ունենում նաև մեր իշխանությունների թողտվությամբ, անգրագետ կառավարման, օպերատիվ իրավիճակին, ռազմաքաղաքական իրադրությանը ժամանակին չարձագանքելու և, ինչու չէ, նաև  դավաճանական պահվածքի պատճառով»։

Պաշտպանության նախկին նախարարը  հիշեցրեց, որ Սյունիքի հատվածում բանավոր հրամանով մեր զորքերը 20 կմ հետ են գնացել. «Դրա հետևանքով Գորիս-Կապան ճանապարհից 20 կմ անցել է ադրբեջանցիներին, դրա հետևանքով  նրանք բարձրացան Սև լիճ, Ներքին Հանդը գտնվում է շրջապատման մեջ: Դրա հետևանքով Արցախը Հայաստանին կապող ճանապարհին հայաթափվեցին մի քանի բնակավայրեր: Նրանք բարձրացան Իշխանասար, ներխուժեցին Սևանա լճի ավազանի շատ բարձունքներ: Ջերմուկ են մտել:

Հիմա այդ ամենը եկել, հասել է Տավուշի մարզ: Ոչ Ոսկեպարի վարչական շրջանի ղեկավարը, ոչ կառավարության ղեկին նստած անձնավորությունը, ոչ մի անհատ իրավունք չունի կամյական որոշել, թե սահմանը որտեղով է անցնելու, այն պարագայում, երբ որ Ադրբեջանը գտնվում է մեր տարածքում, 200 քկմ գրավել է: Ոչ ոք իրավունք չունի գնա, ասի՝ դուք պետք է այս 4 գյուղերը տաք, եթե որևէ համաձայնագիր չկա Ադրբեջանի հետ, քարտեզի վրա չեն աշխատել»։

Ս.Օհանյանը նշեց, որ Հայաստանն Ադրբեջանի հետ 1000 կմ սահման ունի և նախիջևանյան ու տավուշյան հատվածներում են մեր դիրքերն ամուր, որովհետև  նախկին ժամանակահատավածում այդտեղ ձևավորվել է  պաշտպանության համակարգ։